Kıim tigip, qolónermen aınalysady

Elbasy N.Á. Nazarbaevtyń bıylǵy Joldaýy múmkindigi shekteýli jandarǵa úlken serpilis alyp keldi. «Biz olardy belsendi ómirge tartamyz, olar tek járdemaqy alyp qana qoımaıdy, sonymen birge, ózderin qoǵamnyń múshesi, paıdaly eńbekker retinde sezinetin bolady. Bizdiń barlyq áleýmettik ınstıtýttar, úkimettik emes uıymdar, «Nur Otan» partııasy osy jumysty qolǵa alǵandary jón», degen bolatyn Memleket basshysy óz Joldaýynda. Joldaýdy basshylyqqa alǵan qoǵamda búginde kóptegen ıgi bastamalar júzege asa bastady. Sonyń biri jýyrda Kentaý qalasynda ótti. Shaǵyn shaharda múmkindigi shekteýli jandarǵa arnalǵan tigin sehy iske qosyldy. Munda aldymen múmkindigi shekteýli jandar dáris alyp, tiginshi mamandyǵynyń qyr-syryn úırenýde. Mamandar úsh aıda 30 múgedek janǵa oqýdy aıaqtaǵandyǵy jóninde sertıfıkat bermek. Al kásibı maman atanǵandary osy jerde turaqty jumysqa ornalasady. Sondaı-aq, tigin sehynyń jumysy tolyq júıege qoıylǵan kezde arnaıy tapsyrystar arqyly kez kelgen kıim túrlerin tigýdi jos­parlap otyr. Jobanyń negizgi úılestirýshisi «Asar» OQO múgedekter qoǵamdyq birlestigi. – Elbasymyz óz Joldaýynda múmkindigi shekteýli adamdarǵa qamqorlyq kórsetilýi kerektigin, bul ózimizdiń jáne qoǵam aldyndaǵy paryzymyz ekendigin aıtyp ótken bolatyn. Joldaýda kórsetilgen aıqyn basymdyqtardy jergilikti jerde júzege asyrý maqsatynda jumys istep jatyrmyz. Múgedek jandardy turaqty jumyspen qamtý boıynsha da atqaryp jatqan isterimiz bar. Áleýmettik nysandarǵa pandýstar ornatýǵa mekeme basshylary kóńil bóle bastady. Olar turmystyq qyzmet kórsetý, taǵam ónerkásibi, aýylsharýashylyq kásiporyndarynda jumys isteı alady. Biz olarǵa osyndaı jumystardy usyný arqyly belsendi ómirge tarta alamyz. Sonda ǵana olar ózderin qoǵamnyń múshesi, eńbekker retinde sezinetin bolady. Biz tek múmkindik berýimiz qajet, – deıdi «Asar» OQO qoǵamdyq birlestiktiń tóraǵasy Jorahodja Tashodjaev. Búginde úkimettik emes uıymnyń oblysta 20 myńnan astam múshesi bar. Sonyń 800-ge jýyǵy Kentaý qalasynda turady. «Sábı» qaıyrymdylyq qory syıǵa tartqan ekiınvataksı de Túrkistan, Kentaý qalalaryndaǵy jarymjan jandarǵa qyzmet kórsetýde. Halyqqa qyzmet kórsetý ortalyǵynyń mamandary da júrip-turýy qıyn jandardyń úılerine baryp, óz kómekterin berýde. Qoǵamdyq birlestikke múshe azamattardyń ishinde ónerli jastar óte kóp. Olar ásem án aıtyp, qolónermen de aınalysady. Túrkistandyqtar ótken jyly el kóleminde ótken «Bárimiz birdeımiz – kemsitýdi bilmeımiz» atty respýblıkalyq aksııada úlken sahnaǵa shyǵyp, júldemen oralǵan. Munda múmkindigi shekteýli jandardyń salamatty ómir saltyn ustanyp, buqaralyq sportpen aınalysýlaryna da tolyǵymen jaǵdaı jasalǵan. Tipti, óz aralarynan jasaqtalǵan voleıbol komandasy men tennısshiler Atyraý, Shymkent qalalarynda ótken jarystarǵa qatysyp, júldeli oryndarmen oralypty. Qoǵamdyq birlestik jergilikti ákimdikpen birlesip ár aı saıyn 10 múgedek jandy respýblıkadaǵy ońaltý ortalyqtaryna, demalys oryndaryna jiberip otyrady. Qaırat ZAINIShEV. Ońtústik Qazaqstan oblysy.