Sol básekeniń 44-mınýtynda oıynnyń esebin ashqan Fransııa quramasynyń shabýylshysy Olıve Jırý óziniń ulttyq qurama jeıdesindegi 52-shi golyn soǵyp, Fransııanyń fýtbol tarıhyndaǵy eń úzdik surmergenine aınalyp shyǵa keldi. Ol bul jetistigi arqyly áıgili shabýylshy Terrı Anrıden ozyp ketti. Anrı óz eliniń bas komandasy quramynda 123 match ótkizip, qarsylastarynyń qaqpasyna 51 gol soqqan. Sondaı-aq mergender tiziminde Jırýdy Antýan Grızmann (42 gol), Karım Benzema (37) jáne Kılıan Mbappe (29) ókshelep keledi.
Sol oıynda eki márte mergendigimen kózge túsken Kılıan Mbappe álem chempıonattary tarıhyndaǵy nebári 11-matchynda 9-golyn soqty. 23 jastaǵy shabýylshyǵa áıgili germanııalyq surmergen Mıroslav Klozeniń rekordyn buzýǵa (16 gol) bar-joǵy jeti gol qaldy.
Sondaı-aq Fransııa – Polsha matchynda alańǵa shyqqan fransııalyq qaqpashy Ýgo Lorıs ulttyq qurama sapyndaǵy 142-oıynyn ótkizip, otandasy Lılıan Tıýramnyń rekordyn qaıtalady. Ýgo osy ýaqyt aralyǵynda Fransııamen birge 2018 jyly álem chempıonatynda, byltyr Ulttar lıgasy týrnırinde jeńimpaz atandy. Ol bıyl óziniń tórtinshi álem chempıonatyna qatysyp jatyr.
Aqsha ma, ataq pa?
Qatarynan bes álem chempıonatynda gol soqqan tuńǵysh fýtbolshy Krıshtıaný Ronaldý qazirgi tańda klýbsyz júrgeni barshaǵa belgili. Ol álemdik mýndıaldyń ekinshi kúninde-aq Anglııanyń «Manchester Iýnaıted» klýbymen kelisimshartyn buzǵan edi. Ronaldý «Manchester Iýnaıtedpen» birge úsh márte Anglııa chempıony, eki ret Anglııanyń Lıga kýboginde jeńimpaz atanǵan.
Ronaldýdyń klýbsyz qalǵany sol-aq eken, ony búkil álemniń komandalary óz klýbtarynda kórýge nıetti ekendigin bildirip jatyr. Máselen, Krıshtıanýdy Saýd Arabııasynyń «An-Nasr» klýby attaı qalap otyr. Olar portýgalııalyq shabýylshyǵa jylyna 200 mıllıon eýro jalaqy berýge daıyn. Ispanııalyq «Marca» basylymynyń málimeti boıynsha, arabtar portýgalııalyq shabýylshyǵa eki jarym jyldyq kelisimshart usynǵan.
Kelesi chempıonatqa 48 komanda qatysady
Fýtboldan 2026 jyly AQSh, Kanada jáne Meksıkada ótetin álem chempıonatyna ádettegideı 32 qurama emes, 48 eldiń quramasy qatysatyn alǵashqy iri dop dodasy bolmaq.
Osyǵan oraı FIFA men jarysty uıymdastyratyn eldiń fýtbolyna jaýapty mamandarymen tórt jyldan keıin alaýy tutanatyn álem chempıonatynyń toptyq kezeńi formatyn talqylap jatyr.
Chempıonatty uıymdastyrýshylar áýeli 48 quramany úsh-úshten 16 topqa bólip oınatýdy josparlaǵan edi. Endi olar qazirgideı tórt quramadan 12 topqa bólý nusqasyn qarastyryp jatqandaryn málimdedi. Eger FIFA tarapynan sońǵy nusqa qoldaý tabatyn bolsa, onda álem chempıonatynda biz 104 matchtyń kýási bolamyz.
FIFA álem chempıonatyndaǵy matchtar sanynyń artýyna fýtbolshylar men quramalar qarsylyq bildire me dep alańdap otyr. Sebebi quramalar fınalǵa deıin ádettegideı, jeti emes segiz match ótkizýine týra keledi. Al fýtbol mamandary match sanyn arttyrýmen birge álem chempıonatyn taǵy birneshe kúnge sozýdy usynyp otyr.
