Qyzylordada bir kúnde 35 úmitker «Altyn belgini» qorǵap shyqty

QYZYLORDA. 4 maýsym. Ulttyq biryńǵaı testileýdiń birinshi kúni Qyzylorda qalasynda 30 mekteptiń oqýshylary arasynan 35 bitirýshi «Altyn belgini» qorǵap shyqty. Bul týraly qalalyq ishki saıasat bóliminen habarlady. «Ulttyq biryńǵaı testileýdiń birinshi kúni, ıaǵnı 2 maýsymda Qyzylorda qalasynda 30 mekteptiń túlekteri synaq tapsyryp, 35 túlek «Altyn belgini» qorǵap shyqty», - delingen habarlamada. Ishki saıasat bólimindegi derekkózi sondaı-aq, eki oqýshynyń osy kúni eń joǵary 122 ball jınaǵanyn baıandaıdy. Olar № 11, 136 orta mektepterdi bitirýshiler eken. Sol sııaqty 169 oqýshy 100-den joǵary balldyń ıegeri atanǵan. Testileý qaladaǵy Qorqyt ata atyndaǵy Qyzylorda memlekettik ýnıversıteti men «Bolashaq» ýnıversıtetiniń ǵımarattarynda ótkizildi. «Bolashaq» ýnıversıtetinde test tapsyrǵan 471 oqýshynyń ortasha baly 82,2-ni qurady. Al Qorqyt ata atyndaǵy Qyzylorda memlekettik ýnıversıtetinde synaqqa qatysqan 771 túlektiń ortasha baly - 73,1. Búgin, 4 maýsym kúni 16 mekteptiń túlekteri bilim synynda baq synamaq. Erjan Baıtiles. Derekkóz: Qyzylorda qalalyq ishki saıasat bólimi. Foto: alashainasy.kz.