Úkimet • 08 Jeltoqsan, 2022

Dári-dármek óndirisi 50%-ǵa deıin artady

47 ret kórsetildi

Premer-Mınıstr Álıhan Smaıylovtyń tóraǵalyǵymen ótken «Qazaqstan-Eýroodaq» dıalog platformasynyń 11-otyrysyna qatysýshylar densaýlyq saqtaý jáne farmasevtıka salasyndaǵy yntymaqtastyqty nyǵaıtý máselelerin talqylady, dep habarlaıdy Egemen.kz Úkimettiń baspasóz qyzmetine silteme jasap.

Sharaǵa Eýropalyq Odaqtyń Qazaqstandaǵy ókildiginiń basshysy, Avstrııa, Belgııa, Bolgarııa, Germanııa, Italııa, Nıderlandy, Portýgalııa, Slovakııa, Fınlıandııa, Horvatııa, Chehııa jáne Shvesııa elshileri, sondaı-aq QR ortalyq memlekettik organdarynyń ókilderi qatysty.

Álıhan Smaıylovtyń aıtýynsha, densaýlyq saqtaý – Qazaqstan men Eýropalyq Odaq arasyndaǵy ózara tıimdi yntymaqtastyqty arttyrý úshin keleshegi zor salalardyń biri.

Úkimet basshysy bıyl respýblıkada «Deni saý ult» árbir azamat úshin sapaly ári qoljetimdi densaýlyq saqtaý» ulttyq jobasy qabyldanǵanyn eske saldy, onyń negizgi maqsaty – 2027 jylǵa qaraı ómir súrý uzaqtyǵyn 75 jylǵa deıin ulǵaıtý. Sonymen qatar onyń aıtýynsha, QR preparattardy kelisim-shartpen óndirý mehanızmin iske asyrý arqyly farmasevtıkalyq ónimderdiń óndirisin 50%-ǵa deıin arttyrýdy josparlap otyr.

«Qazaqstan men Eýroodaq aldynda medısına jáne farmasevtıka salalaryndaǵy áriptestikti nyǵaıtý úshin keń múmkindikter ashyldy. Biz ózara yntymaqtastyqqa jáne aldymyzda turǵan mindetterdi birlesip sheshýge daıynbyz», dedi Álıhan Smaıylov. 

Otyrysqa qatysýshylar sala qyzmetkerleriniń biliktiligin arttyrý, medısınalyq mekemelerdi basqarý, dári-dármekterge baǵa belgileýdi retteý, zııatkerlik menshik quqyqtaryn qorǵaý, sondaı-aq jalpy densaýlyq saqtaý júıesin damytý máselelerin talqylady.

Shara aıasynda «suraq-jaýap» sessııasy ótti, onyń barysynda ortalyq memlekettik organdardyń ókilderi sheteldik áriptesterdiń qyzyqtyrǵan taqyryptary boıynsha saýaldaryna jaýap berdi.

Otyrysty qorytyndylaı kele, Premer-Mınıstr Úkimet aldaǵy ýaqytta ózara tıimdi yntymaqtastyqty nyǵaıtý jónindegi qadamdardy ázirleý jáne iske asyrý úshin kelip túsken usynystardy jedel qaraıtynyn atap ótti.

Sońǵy jańalyqtar

Elimizde et konservileriniń óndirisi artty

Ekonomıka • Búgin, 14:25

Elordada gazel avtokóligi janyp ketti

Elorda • Búgin, 12:18

Uqsas jańalyqtar