Elorda • 08 Jeltoqsan, 2022

Elordada 900-den astam qoǵamdyq oryn abattandyryldy

Elordany qaıta qurý boıynsha aýqymdy jumystar «Astana - jaıly qala» master-jospary aıasynda júrgizildi. Astanada qala turǵyndary men qonaqtar bos ýaqytyn jaıly ári densaýlyǵyna paıdaly kúıde ótkize alatyn jańa tartymdy oryndar ashyldy, dep habarlaıdy Egemen.kz qala ákimdiginiń baspasóz qyzmetine silteme jasap.

Aıana TOǴANBEK

Sońǵy jyldary elordada 900-den astam aýla men qoǵamdyq keńistik (saıabaqtar, gúlzarlar, jelekjoldar) abattandyryldy: kópir asty keńistikter, «Teatr» býlvary («Jastar» saraıynan Mýzykalyq jas kórermen teatryna deıin), «Demalys promenade», qutqarýshylardyń, muǵalimderdiń, medısına qyzmetkerleriniń qurmetine arnalǵan gúlzarlar, kóshe sporty kolızeıi ashyldy jáne t.b.

Máselen bıyl qalada Beıbitshilik jáne kelisim saraıy aýdanynda amfıteatr, qalanyń oń jaǵalaýynda taǵy bir jaıaý júrginshiler joly, «Vstrecha» SÚ janyndaǵy qoǵamdyq keńistik, «Beıbitshilik jáne kelisim» saıabaǵy, qalalyq alań, jelekjoldar jáne t.b. salyndy).

Abattandyrý kezinde eldi mekenderge erekshe nazar aýdarylady. Eldi mekenderdiń ózinde 300-ge jýyq aýla men qoǵamdyq keńistik abattandyryldy, Kóktal aýmaǵynda 16 gektardy alyp jatqan saıabaq salyndy.

Qoǵamdyq keńistikter men aýla aýmaqtarynda árkim óz qalaýy boıynsha serýen qura alady: basketbol/fýtbol alańdary, workout-aımaqtar, tynysh kúıde demalýǵa arnalǵan aımaqtar, átkenshekter, sol sııaqty shyǵarmashylyq talantyn pash etýge arnalǵan sahnalar, konkı-aımaqtar jáne t.b.

2023 jyly Úrker (Ilınka), Telman eldi mekenderindegi, Sh.Aıtmatov kóshesindegi, J.Táshenov jáne T.Hýseın kósheleriniń qıylysyndaǵy, Abaı dańǵylynda gúlzarlardy abattandyrý josparlanyp otyr. Sol sııaqty Kúıshi Dına kóshesinen Mustafın kóshesine deıin, Júrgenov kóshesi, 28/1, Qoshqarbaev kóshesi, 45, Qordaı jáne Taıqazan kósheleriniń qıylysynda, K.Ázirbaev kóshesi, 10-14 jáne t.b. Abylaıhan dańǵylynyń boıynda saıabaqtar (gúlzarlar, jelekjoldar) bolady.

Sonymen qatar Kishi Taldykólde ekopark salynady. Ekopark jobasy aýmaqty abattandyrýdy, sý balansyn saqtaı jáne tolyqtyra otyryp, rekreasııalyq aımaq qurýdy kózdeıdi.