Aqparat jáne qoǵamdyq damý mınıstri Darhan Qydyráli memlekettik «Daryn» syılyǵynyń ıegerlerin quttyqtap, marapattady.
– Táýelsizdik alǵan jyldan bastap memleket tarapynan jastarǵa únimi qoldaý kórsetilip kele jatqanyn bilesizder. Osy oraıda ózderińizge aıtar súıinshi jańalyǵymyz bar. Prezıdent Qasym-Jomart Toqaevtyń Jastar jyly aıasynda bergen tapsyrmasyna saı Parlament Senaty «Memlekettik jastar saıasaty týraly» zań jobasyn maquldady. Bul zań erejesi Memleket basshysyna qol qoıýǵa joldanady. Zań jobasynda kórsetilgen basty máselelerdiń biri – jastardyń jasyn 35 jasqa deıin kóterý boıynsha usynysymyz qabyldandy. Onyń ıgiligin jastardyń barlyǵy kóredi dep oılaımyn. Sondyqtan búginge deıin «Daryn» syılyǵyna jas shekteýine baılanysty qatysa almaı qalǵan talantty jastarymyzǵa da múmkindik beriledi. Jastardyń jaǵdaıyn qarastyratyn osy zań jobasy qutty bolsyn! Bıyl «Daryn» memlekettik jastar syılyǵyna 30 jyl tolyp otyr. Osy otyz jyldyń ishinde elimizdegi 300-den astam talantty jas atalǵan syılyqtyń ıegeri atanǵan eken. «Daryn» syılyǵynyń barsha laýreattaryn otyz jyldyq mereıli belespen quttyqtaımyn!
Aldaǵy ýaqytta syılyqtyń kólemin joǵarylatý boıynsha máseleni qarastyryp jatyrmyz. Jyl saıyn konkýrsqa kelip túsetin ótinishter sany artyp keledi. Bul jastardyń osy syılyqqa qyzyǵýshylyǵynyń óskenin kórsetedi. «Daryn» syılyǵy jańa daryndardy jarqyrata bersin! – dedi mınıstr.
Mınıstr konkýrstyq irikteý nátıjesinde 10 atalym boıynsha 19 jeńimpaz anyqtalǵanyn, olardyń qatarynda aty álemge tanymal Jansaıa Ábdimálik pen Bıbisara Asaýbaeva syndy shahmatshy qyzdar bar ekenin atap ótti. Sonymen memlekettik «Daryn» syılyǵynyń «Estrada» atalymy boıynsha Erkeǵalı Rahmadıev atyndaǵy Memlekettik akademııalyq fılarmonııanyń ártisi Aqbota Qusnadın men Ǵazıza Jubanova atyndaǵy Aqtóbe oblystyq fılarmonııasynyń ártisi Nurtas Omarov marapattaldy. «Halyq shyǵarmashylyǵy» atalymy boıynsha Qurmanǵazy atyndaǵy Qazaq ulttyq konservatorııasynyń oqytýshysy Tańat Sadenov pen Roza Baǵlanova atyndaǵy «Qazaqkonsert» memlekettik konserttik uıymynyń ártisi Aıaýlym Qamajan laıyq dep tanyldy. Sol sekildi «Ádebıet» atalymy boıynsha Sherhan Talapov pen Faızolla Tóltaı, «Teatr jáne kıno» atalymy boıynsha Nazerke Serikbolova men Mıras Ábil, «Dızaın jáne beıneleý óneri» atalymy boıynsha Almas Tólep pen Arnur Jabaǵın, «Jýrnalıstıka» atalymy boıynsha Sherhan Ábdelıev, «Qoǵamdyq qyzmet» atalymy boıynsha Oksana Nabıeva, Tımýr Jumyrbaev, sondaı-aq «Ǵylym» atalymy boıynsha Kamıla Egizbek jáne Farýh Mashýrov laıyq dep tanyldy. Osy tizimde «Klassıkalyq mýzyka» atalymy boıynsha Shyńǵys Rasylhan, Áıgerim Altynbek, «Sport» atalymy boıynsha Bıbisara Asaýbaeva, Jansaıa Ábdimálik syndy myqtylar bar. Osy tusta «Daryn» memlekettik jastar syılyǵyna ár atalym boıynsha 600 myń teńge somasynda aqshalaı syılyq taǵaıyndalǵanyn aıta ketken lázim.
Memlekettik «Daryn» syılyǵynyń «Ǵylym» salasy boıynsha laýreaty Farýh Mashýrov jastardy yntalandyrý maqsatynda taǵaıyndalǵan syılyqtyń ıegeri bolǵanyna dán rıza ekenin aıtady.
– О́zim Súleımen Demırel atyndaǵy ýnıversıtettiń aǵa oqytýshysymyn. Naq qazir Phd boıynsha oqýdy aıaqtap, doktorlyq dıssertasııa qorǵaýǵa daıyndalyp jatyrmyn. Sonymen qatar ǵylymı jobalarmen aınalysyp, jobalarǵa jetekshilik etip te júrmin. Joǵary oqý ornynda jetekshim akademık Asqar Jumadildaevtyń arqasynda úlken jumys atqardyq. Jetekshimniń demeýimen ózim bala kezden qyzyqqan matematıka pánin tereńirek bilýge múmkindik ashyldy. Alǵashynda ǵylym jolyna túsken soń, jumysymdy orta jolda toqtatýdy da oılaǵan kezderim boldy. Biraq matematıka pánine degen qyzyǵýshylyǵymnyń arqasynda mundaı kezeńderdi ońaı eńserdik. Sonyń nátıjesinde talmaı eńbektený kerektigin túsindim. Búgin, árıne, memlekettik «Daryn» syılyǵynyń laýreaty atanǵanyma dán rızamyn. Endi alda doktorlyq dıssertasııamdy sátti qorǵap, ǵylym salasyna úles qosýdan tanbaımyn degen oıdamyn, – deıdi Farýh Mashýrov.
