Brazılııalyqtardyń «baleti» aıaqtaldy
Er-Raııandaǵy kezdesýdiń sózsiz favorıti Brazılııa quramasy edi. Olar 1/8 fınalda Ońtústik Koreıany 4:1 esebimen oısyrata utqanda, jankúıerler «endi Neımar bastaǵan jigitterdi toqtatatyn kúsh joq shyǵar» dep paıymdady. Biraq Zlatko Dalıchtiń bul oıynǵa óz jospary boldy. Ońtústik Amerıkadan kelgen oǵlandardan esh qaımyqpaǵan horvattar 120 mınýt boıy aıanbaı aıqasty. Iá, Tıte shákirtteriniń qarsylastaryna qaraǵanda gol soǵýyna múmkindikteri edáýir kóp bolǵany ras. Alaıda syn saǵatta qart qurlyqtyń ókilderi bir judyryq bolyp jumyla bildi. Onyń ústine, qaqpashy Domınık Lıvakovıchtiń minsiz oıyny tamsandyrdy. Ol óz qaqpasyn talaı qaýipti jaǵdaıdan aman alyp qalyp, barlyǵy 11 seıv jasady.
Negizgi ýaqyt teń aıaqtaldy. Overtaımda brazılııalyqtar esep ashty. 105-mınýtta Neımar mergendik tanytty. Biraq olardyń qýanyshy uzaqqa sozylmady. Úzilisten keıin janushyra alǵa umtylǵan horvattar keremet kombınasııa uıymdastyrdy. Onyń aqyry Brýno Petkovıchtiń ǵajap gol soǵýymen aıaqtaldy. Esep – 1:1.
Penaltı soǵý barysynda Horvatııa fýtbolshylary barlyq múkindikterin utymdy paıdalandy. Nıkola Vlashıch, Lovro Maıer, Lýka Modrıch jáne Mıslav Orshıch nysanany dál kózdedi. Qarsylastary eki márte qatelesti. Rodrıgo tepken dopty Lıvakovıch keri qaıtarsa, Markınos baǵanaǵa tıgizdi. Esep – 4:2. Osylaısha, horvattar jartylaı fınalǵa joldama aldy. Al báseke aıaqtalǵan bette alty jyldan asa Brazılııa quramasynyń bas bapkeri bolǵan Tıte óz erkimen qyzmetinen ketetinin resmı túrde málimdedi.
15 eskertý jasalǵan oıyn
О́zgelerdi aıtpaǵanda, tisqaqqan býkmekerlerdiń ózderine Nıderland pen Argentına quramalary arasyndaǵy kezdesýdiń jeńimpazyn anyqtaý ońaıǵa soqqan joq. Tipten, kópti kórgen kánigi mamandar men saqa sarapshylardyń pikirleri de ekige jaryldy. Bastapqyda biz ish pystyrarlyq oıynnyń kýási boldyq. Jarty saǵattan asa ýaqyt boıy qos komanda bir-biriniń qaqpa mańyna mańaılaı almady. Kóbine-kóp tartys alań ortasynda órbidi. Tek 35-mınýtta Lıonel Messıden jaqsy pas alǵan Naýel Molına esep ashty. Alaıda odan keıin de kópke deıin oıyn joǵarydaǵydaı ssenarıı boıynsha órbidi.
73-mınýtta Messı 11 metrlik núkteden nysanany dál kózdegennen keıin barlyǵymyz da «Lýı van Gal shákirtteri endi eshteńe ózgerte almaıdy» dep oıladyq. Biraq munymyz beker eken. Tek sodan keıin baryp qana es jıǵan nıderlandtyqtar namysqa qamshy basty. Nátıje kóp kúttiregen joq. 83-mınýtta Vaýt Veghorst esep aıyrmashylyǵyn qysqartty. Negizgi ýaqytqa tóreshi Mateý Laos taǵy 10 mınýt qosty. Sol ýaqyt aıaqtalar tusta «Qyzǵaldaqtar eliniń» fýtbolshylary tarazy basyn teńestirip ketti. Aıyp alańynda Tıon Kopmeıners ózi tepkenniń ornyna dopty bir top qorǵaýshy arasynan Veghorstqa syrǵyta saldy. Ol múlt ketken joq – 2:2. Overtaımda jeńimpaz anyqtalmady. Sodan penaltı soǵyldy. Nıderland quramasynyń serkesi Vırdjıl van Deık pen Stıven Bergeıs oryndaǵan alǵashqy eki soqqyny qaqpashy Damıan Emılıano Martınes keremet seıvtermen keri qaıtardy. Sol kezde argentınalyqtardyń jartylaı fınalǵa shyǵatynyna eshkimniń kúmáni bolmady. Aıtqandaı-aq, Lıonel Skalonıdiń komandasy kózdegen maqsatyna qol jetkizdi. Jeńis golyn Laýtaro Martınes soqty – 4:3. Osy sátsizdikke tóze almaǵan 71 jastaǵy tanymal bapker Lýı van Gal otstavkaǵa ketti.
Atalǵan báseke barysynda 45 jastaǵy ıspanııalyq qazy Mateý Laos qos komandanyń oıynshylaryna 15 márte eskertý jasady. Bul – álem chempıonattary tarıhyndaǵy taǵy bir rekord!
Marokko myqty eken
Senbiden jeksenbige qaraǵan túni Dohadaǵy «Ál-Týmama» stadıonyna jınalǵan 45 myńǵa jýyq jankúıerdiń barlyǵy da tek Marokkony qoldaǵandaı áser qaldyrdy. Olaı deýge negiz, olar shabýylǵa shyqsa, barsha kórermen aıǵaıǵa basyp, syrnaılatyp, kerneıletti. Al dop Portýgalııa oıynshylaryna tıse, kerisinshe, jaqtyrmaǵandaı syńaı tanytty. Sonyń áseri bolsa kerek, qara qurlyqtan kelgen jigitter óte senimdi oınady. Pleı-offtyń alǵashqy kezeńinde Pıreneı túbeginiń túlekteri Shveısarııany 6:1 esebimen oısyrata utqany belgili. Ol kezde qarsylastary birden tizgindi óz qoldaryna alýǵa tyrysqan. Al ondaı oıyn máneri portýgalııalyqtarǵa jaqsy jaǵady. Sodan marokkolyqtar jaqsy sabaq alǵan eken. Olar oıyn tizginin Portýgalııaǵa berip qoıdy da, ózderi qarymta shabýylǵa júginýdi jón kórdi. Bul taktıka óz jemisin berdi. 42 mınýtta Eseff En-Naserı qaqpashynyń óreskel qateligin paıdalanyp, dopty torǵa toǵytty.
Portýgalııa quramasy úzilisten keıin de jaǵdaıdy túzeı almady. Amaly taýsylǵan Fernandý Santýsh 51-mınýtta Krıshtıaný Ronaldýdy alańǵa shyǵardy. Biraq aty ańyzǵa aınalǵan shabýylshynyń ózi de jaǵdaıdy ózgerte alǵan joq. Bul komandanyń sapynda Jýan Felıks óte belsendi boldy. Alaıda onyń tepken doptarynyń barlyǵy da qaqpadan joǵary ketti. Basqalary da eshteńe óndire almady. Taǵy bir sátte dop mańdaıshaǵa tıdi. Sóıtip, 1:0 esebimen jeńiske jetken Marokko jartylaı fınalǵa shyqty. Olar tek Afrıka qurlyǵy ǵana emes, arab álemindegi osy mejege jetken tuńǵysh komanda retinde tarıhta qaldy.
Harrı Keınniń qorlyǵyn-aı!
Kóp uzamaı Ál-Haýrdaǵy «Ál-Baıt» stadıonyndaǵy Anglııa men Fransııa quramalary arasynda alapat aıqasty tamashaladyq. Alǵashqy taım tolyqtaı fransýzdardyń basymdyǵymen ótti. Olar óte senimdi oınap, qarsylastaryn qos qaptaldan jıi-jıi qyspaqqa aldy. Aǵylshyndar ara-tura shabýyldaǵanymen, óte saq oınaýǵa tyrysty. Syrt kózge olar qarsylastarynan qaımyǵyp júrgendeı áser qaldyrdy. Olaı deýge negiz, qıt etse, dopty artqa berip, táýekelge barmady. Al dop Kılıan Mbappege tıse, birneshe oıynshy ony qorshaýǵa alyp, ábden ábigerge tústi. 17-mınýtta fransýzdardyń kezekti bir shabýylynan keıin esep ashyldy. Jartylaı qorǵaýshy Orelen Tchýamenıdiń shamamen 22 metrdeı qashyqtyqtan qaqyrata tepken doby qaqpa torynan tabyldy.
54-mınýtta Harrı Keın 11 metrlik núkteden tarazy basyn teńestirdi. Naǵyz qyzyq sodan keıin bastaldy. Qos komanda alma-kezek qaýipti shabýyl uıymdastyryp, kórermenderdiń delebesin ábden qozdyrdy. Biraq basymdyq báribir fransýzdar jaǵynda boldy. Olar shıraq áli senimdi qımyldady. Nátıjesinde, 78-mınýtta Olıve Jırý álem chempıondaryn alǵa shyǵardy. Desek te matchtyń sońyna taman Anglııa quramasynyń da gol soǵýyna múmkindigi boldy. VAR-dyń kómegine júgingen tóreshi Ýgo Lorıstiń qaqpasyna taǵy penaltı belgiledi. Biraq bul joly Keınniń tepken doby mańdaıshadan áldeqaıda bıik ketti. Esep – 2:1. Uzaq jyldar boıy Tumandy Albıon eliniń basty surmergeni sanalyp kelgen saqa oıynshynyń júıkesi syn saǵatta syr berdi. Sonyń saldarynan aǵylshyndardyń júldeli oryndar úshin talassaq degen úkili úmiti úzildi. Al Dıde Deshamnyń komandasy jartylaı fınalǵa joldama aldy.
Osylaısha, jartylaı fınalǵa shyqqan tórt myqty komanda anyqtaldy. Endi 13 jeltoqsanda Lýsaılda Argentına men Horvatııa kúsh synassa, kelesi kúni Marokko men Fransııa sheberlik baıqasady. 17 jeltoqsanda qola medal úshin tartysty tamashalasaq, al bıylǵy álem chempıonatynyń jeńimpazy 18 jeltoqsanda anyqtalady.
Parlament Májilisiniń depýtaty
Saýytbek Abdrahmanov:
Eger fýtbolda oıyn taǵdyryn tek sheberlik sheshetin bolsa, ol dál mundaı tanymal bolmas edi dep te oılaımyn. Fýtboldyń jahan jurtshylyǵynyń júregin jaýlap alǵan kúshi tek sporttyń sheńberinde qalyp qoımaıtyndyǵynda, onyń zańdylyqtaryna baǵynbaıtyndyǵynda, domalaq doptyń dóńgelengen dúnıedeı tylsymdyǵynda, oıyn nátıjesin keıde bolmashy qatelik, keıde tipti ǵaıyptan taıyp kele qalǵan kezdeısoqtyq sheship kete beretin keremetinde, qysqasy, ómirdiń ózindeı ózgermeliliginde. Sonysymen de árbir fýtbol matchy qaıtalanbaıtyn spektakl sıpatymen bizdi ózine tarta beredi, tarta beredi.
IT mamany, abaıtanýshy
Sultan Ybyraı:
Brazılııa, Portýgalııa... Jalpy álemdi ádiletsizdik bılep ketkendeı kórinedi, kóringende bılep turǵany da ras qoı... Bireýler fýtbol óldi depti. Másele, Ronaldýdyń kóz jasynda emes. Bap shappady, baq shapty. Nıkola Tesla men Ibn Batýta urpaqtary úshin.
