Sapardyń birinshi kúni Mınıstr Germanııa ekonomıkasy shyǵys komıtetiniń (GEShK) qurylǵanyna 70 jyl tolýyna arnalǵan saltanatty is-sharaǵa qurmetti qonaq retinde qatysty.
Is-sharaǵa GFR Federaldy kansleri Olaf Shols, Vıse-kansler - Federaldy ekonomıka jáne klımatty qorǵaý mınıstri Robert Habek, GFR memlekettik organdarynyń basshylary, jetekshi nemis kompanııalary men bıznes qaýymdastyqtarynyń top-menedjerleri qatysty.
GEShK - Shyǵys Eýropa jáne Ortalyq Azııanyń 29 memleketinde nemis kapıtaly bar ınvestısııalyq jobalardy ilgeriletetin iri jáne kóne bıznes-qaýymdastyqtardyń biri. Komıtet is júzinde barlyq bıznes salalarynyń múddelerin bildiretin Germanııanyń iri negizgi iskerlik birlestikterin biriktiredi.
Is-shara aıasynda mınıstr M.Tileýberdi Germanııanyń Federaldy kansleri O.Sholspen kezdesip, sondaı-aq GEShK Basqarma tóraǵasynyń orynbasary Gans-Ýlrıh Engel jáne atqarýshy dırektor Maıkl Harmspen kelissózder júrgizdi.
GEShK basshylyǵyna Qazaqstan Respýblıkasynyń Prezıdenti Qasym-Jomart Toqaevtyń quttyqtaý joldaýy tabys etildi. Onda Shyǵys komıtetiniń Qazaqstan men Germanııa arasyndaǵy ekijaqty saýda-ekonomıkalyq jáne ınvestısııalyq yntymaqtastyqty damytýǵa qosqan baǵa jetpes úlesi erekshe atalǵan.
