Drondar nysandardy dıagnostıkalaýdy qaýipsiz etip qana qoımaı, úrdisti jyldam, arzan jáne tıimdirek etedi.
«Kópirlerdi dástúrli túrde tekserý kóp ýaqytty talap etedi. Jolshylar ýákiletti organdarǵa habarlaıdy, jol polısııasynan ruqsat alady jáne avtomobıl qozǵalysyn ishinara nemese tolyǵymen toqtatady. Budan bólek arnaıy kran men eskertý belgilerin birneshe ret jyljytýǵa májbúr. Al tekserý qıynǵa soǵatyn jerlerge mamandar belderine arqan baılap túsedi. Drondy qoldaný arqyly jumys aıtarlyqtaı jeńildep, tekserý ýaqyty 3-4 ese qysqarady. Osylaısha biz kópirler men jol aıryqtaryn kóbirek qamtı alamyz», dep atap ótti «QazjolǴZI» AQ Jol konstrýksııalary jáne jańa tehnologııalar basqarmasynyń bas mamany Qaısar Shalqar.
Aıta keteıik, drondar jol qozǵalysyna kedergi keltirmeıdi, al qashyqtan basqarý jolaýshylardyń ómiri men densaýlyǵyna qaýip tóndirmeýge múmkindik beredi. Endigi kezekte bıiktikten qulap ketý, ótip bara jatqan kóliktiń astyna túsý syndy qaýip-qaterdiń aldyn alýǵa bolady.
«Dron arqyly zertteý júrgizýdiń birneshe artyqshylyǵy bar, ol –jasyryn jerlerdi tekserý. Keıin túsirilgen beınejazbalardy kompıýterde egjeı-tegjeıli taldaýǵa, jiti tekserýge bolady. Sondaı-aq bolashaqta tehnologııanyń kómegimen biz barlyq kópir qurylymyn sıfrlandyra alamyz. Búginde elimiz boıynsha 2 myńnan astam kópir bar», deıdi ınstıtýt qyzmetkeri.
Kópirlerdi júıeli túrde tekserý qurylystardyń tozýy men apattarǵa alyp keletin aqaýlardy erte anyqtaýǵa ári joıýǵa múmkindik beredi. Amerıkalyq tájirıbege súıene otyryp, Q.Shalqar ýaqytyly dıagnostıka jasaý obektilerdi ustap-kútýge ketetin shyǵyndardy azaıtýǵa yqpal etetinin atap ótti. Onyń aıtýynsha, jańa kópirlerdi 5 jylda bir, eskilerin 3 jylda bir ret tekserý qajet. Jyl saıyn «QazjolǴZI» AQ kem degende 15 nysandy zertteıdi. Jalpy 59 jyldyń ishinde ınstıtýt myńnan astamyna dıagnostıka jasaǵan.
