Ekologııa, geologııa jáne tabıǵı resýrstar mınıstri Serikqalı Brekeshevtiń aıtýynsha, Tujyrymdamanyń negizgi maqsaty – paıdaly qazbalardy barlaýǵa ınvestısııa tartý úshin jaǵdaı jasaý. Sonymen qatar salanyń negizgi problemalaryn sheshý úshin kelesi tórt baǵyt boıynsha jumys júrgizý josparlanyp otyr: 1) jer qoınaýyn geologııalyq zertteýdiń tıimdiligin arttyrý jáne mıneraldyq-shıkizat bazasyn tolyqtyrý; 2) geologııa salasyn sıfrlandyrý jáne aqparattandyrý; 3) ǵylymı-zertteý jáne kadrlyq qamtamasyz etý; 4) ınfraqurylymdy damytý.
Indýstrııa jáne ınfraqurylymdyq damý mınıstri Qaıyrbek О́skenbaevtyń aıtýynsha, Tujyrymdama sheńberinde jer qoınaýyn paıdalaný salasynda lısenzııalar alý jónindegi rásimderdi barynsha jeńildetý, ınvestorlar men ýákiletti memlekettik organdar arasyndaǵy bıznes-prosesti avtomattandyrý, qatty paıdaly qazbalardy barlaý men óndirýge lısenzııalar berý prosesiniń «ashyqtyǵyn» qamtamasyz etý josparlanyp otyr.
Ári qaraı osy taqyryp boıynsha Energetıka mınıstri Bolat Aqsholaqov baıandama jasady.
Baıandamashylardy tyńdap bolǵan Premer-Mınıstr Qazaqstan mıneraldyq-shıkizattyq resýrstardyń sany men túri jaǵynan álemde jetekshi oryndardyń qatarynda ekenin, alaıda sońǵy jyldary paıdaly qazbalardyń kóptegen túri boıynsha jańa qorlardy ashý jumystary mardymsyz júrip jatqanyn atap ótti. Mysaly, taıaý onjyldyqta Shyǵys Qazaqstanda Orlov, Maleev, Tıshınskoe jáne Rıdder-Sokolnoe sııaqty iri metall ken oryndary ıgeriledi.
«О́nerkásiptik shıkizatqa suranystyń ósýi jańa ken oryndaryn izdep-taýyp, mıneraldyq-shıkizat bazasyn keshendi damytýdy talap etedi. Osyǵan baılanysty geologııalyq barlaý salasyna ınvestısııalar tartý úshin tıisti jaǵdaı jasaý qajet», dedi Álıhan Smaıylov.
Úkimet basshysynyń aıtýynsha, búginde ınvestorlarǵa keshendi servıstik qoldaý kórsetý maqsatynda Ulttyq geologııalyq qyzmet quryldy, KAZNEDRA aqparattyq platformasy pılottyq rejımde jumys istep tur jáne jer qoınaýyn paıdalaný salasynda normatıvtik-quqyqtyq baza túbegeıli ózgerdi. Bul jer qoınaýy men geologııalyq aqparattyń barynsha qoljetimdi bolýyna, ken ornyn ashqan kompanııalardyń ony ári qaraı ıgerý úshin quqyqtaryn qorǵaýdy kúsheıtýge jáne barlyq prosedýrany aıtarlyqtaı jyldamdatýǵa múmkindik berdi.
«Búgin qaralyp otyrǵan Tujyrymdama jer qoınaýyn memlekettik geologııalyq zertteýdiń tıimdiligin arttyrýǵa baǵyttalǵan jańa sharalar eskerile otyryp, ázirlendi. Onda salany sıfrlandyrý, ınfraqurylymdy damytý, kadrlyq áleýetti arttyrý sııaqty salany damytýdyń basym baǵyttary kórinis tapqan», dedi Premer-Mınıstr.
Usynylǵan tujyrymdama boıynsha daýys berý rásimi ótkizilgennen keıin Álıhan Smaıylov Ekologııa, geologııa jáne tabıǵı resýrstar mınıstrligine múddeli memlekettik organdarmen birlesip, oǵan engizilgen bastamalardyń tıimdi iske asyrylýyn qamtamasyz etýdi tapsyrdy.
