Is-sharaǵa TÚRKSOI halyqaralyq uıymynyń Bas hatshysy Sultan Raev, «Otandastar qory» kommersııalyq emes aksıonerlik qoǵamynyń prezıdenti Abzal Saparbekuly, Iýnýs Emre atyndaǵy túrik mádenı ortalyǵynyń dırektory Almagúl Isına, professor, túrkolog Qarjaýbaı Sartqojauly, fılologııa ǵylymdarynyń doktory, UǴA akademıgi Sherýbaı Qurmanbaıuly, basqa da zııaly qaýym ókilderi qatysty.
«Búginde qanatyn keńge jaıǵan, túrki memleketteri arasyndaǵy mádenı-rýhanı kópirge aınalǵan TÚRKSOI – túrki dúnıesindegi alǵashqy uıym boldy. Kelesi jyly halyqaralyq uıymnyń qurylǵanyna 30 jyl tolady. Onyń dińgegi sonaý 1993 jyly qazaq jerinde – Almaty qalasynda qalandy. Sol sebepten de, túrki keńistiginde qaýqarly, bedeldi uıymnyń tarıhynda Qazaqstannyń saıası mańyzy úlken. Túrki halyqtaryn qaı salada da biriktire alatynyn TÚRKSOI ótken otyz jyldyń bederinde dáleldedi. Oǵan qanshama atqarylǵan irgeli ister men bastamalar, tyń jobalar, esepsiz is-sharalar tizbegi kýá. Aldaǵy mereıtoıǵa oraı Qazaqstanda birqatar is-shara josparlanyp otyr. Máselen, Sultan Baıbarystyń 800 jyldyǵy, odan bólek 2023 jyl – TÚRKSOI aıasynda kórnekti memleket jáne qoǵam qaıratkeri, qazaq rýhanııatynyń damýyna zor úles qosqan ultjandy tulǵanyń 125 jyldyǵyna oraı «Temirbek Júrgenov jyly» dep jarııalandy», dedi Sultan Raev.
Kórmege TÚRKSOI halyqaralyq uıymynyń qurylǵanyna 30 jyl tolýy qarsańynda jarııalanǵan túrkitildes avtorlardyń shyǵarmalary, balalar ádebıetiniń ıllıýstrasııalanǵan basylymdary, oqyrmandardyń keń aýqymyna arnalǵan ǵylymı-kópshilik kitaptar usynyldy.
