2022 jyldyń 11 aıynda qazaqstandyqtarǵa múgedektik jáne asyraýshysynan aıyrylý boıynsha járdemaqy túrinde 402 mlrd teńgeden astam qarajat tólendi. Qarasha aıynda respýblıkalyq bıýdjetten múgedektigi boıynsha memlekettik áleýmettik járdemaqy tóleýge - 28,5 mlrd teńge, asyraýshysynan aıyrylý jaǵdaıy boıynsha - 9,3 mlrd teńge bólindi.
1 jeltoqsandaǵy jaǵdaı boıynsha múgedektik boıynsha memlekettik áleýmettik járdemaqy alýshylardyń sany 527,7 myń, asyraýshysynan aıyrylý jaǵdaıy boıynsha - 184,3 myń adamǵa jetti.
«Múgedektigi jáne asyraýshysynan aıyrylý jaǵdaıy boıynsha memlekettik áleýmettik járdemaqylardyń mólsheri múgedektik tobyna jáne sebebine, qaıtys bolǵan asyraýshynyń asyraýyndaǵy adam sanyna, sondaı-aq tıisti qarjy jylyna arnalǵan «Respýblıkalyq bıýdjet týraly» zańda belgilenetin eń tómengi kúnkóris deńgeıine baılanysty bolady», delingen vedomstvo habarlamasynda.
2022 jylǵy 1 jeltoqsandaǵy jaǵdaı boıynsha múgedektigi boıynsha tólenetin memlekettik áleýmettik járdemaqynyń ortasha mólsheri - 54 062 teńge, asyraýshysynan aıyrylý jaǵdaıy boıynsha tólenetin járdemaqy - 50 368 teńgeni qurady.
Aıta ketsek, múgedektigi boıynsha jáne asyraýshysynan aıyrylý jaǵdaıy boıynsha memlekettik áleýmettik járdemaqylardyń mólsheri 2023 jylǵy 1 qańtardan bastap eń tómengi kúnkóris deńgeıiniń ulǵaıýyna baılanysty 8,5%-ǵa artady.
