Bul daý 2020 jyly mamyr aıynda Oral qalalyq ákimdiginiń qalanyń Bas josparyn belden basyp, «Kýbleı» zaýytynyń sanıtarlyq qorǵaý aımaǵyna «Sıolkovskıı» turǵyn úı keshenin salýǵa ruqsat beretin qaýly shyǵaryp bergen kúnnen bastalǵanyn eske sala keteıik.
Osyǵan deıin QR Aýyl sharýashylyǵy mınıstrligi de zaýytqa arasha túsip, arnaıy málimdeme jasaǵanyn eske sala ketý kerek.
Bıyl 23 qarasha kúni Oral qalasynyń №2 qalalyq soty «Kýbleı» daýyna qatysty núkteni qoıa almaı, taraptardyń ymyraǵa kelýin surap, isti belgisiz merzimge toqtatqan edi. Eki jaq máseleni medıasııa jolymen sheshpeıtinin aıtqan soń búgin qaıta ekinshi ret sózjarys ótti.
Sózjarystyń basynda «Kýbleı» zaýytynyń zańdy ókilderi QR Indýstrııa jáne ınfraqurylymdyq damý mınıstrligi men QR Densaýlyq saqtaý mınıstrliginiń jibergen jańa jaýabyn is materıaldaryna qosýdy surady. «Irmenova» jeke kásipkerliginiń zańgerleri men Oral qalasy ákimdiginiń ókilderi kerisinshe sýdıaǵa jańa málimetterdi iske qosýdyń qajeti joq ekenin aıtyp, qarsy shyqty. Biraq Úkimetke saýalhatty joldaǵan BQO ekonomıkalyq soty bolǵandyqtan sýdıa vedomstvolardyń joldaǵan jaýabyn is materıaldaryna qosty.
Al sanıtarlyq-epıdemıologııalyq baqylaý komıtetiniń sotqa jibergen jańa jaýabynda «Kýbleı» zaýytynyń sanıtarlyq qorǵaý aımaǵy bar, ol aýmaq keminde 100 metr bolýy tıis jáne onda turǵyn úılerdi salýǵa tyıym salynǵan degen jaýap joldaǵan.
«Kýbleı» zaýytynyń ókilderi jergilikti bılik qujattardy zańsyz rásimdeýden bólek bıýdjettiń qarajatyn talan-tarajǵa túsirgenin, óıtkeni zańsyz soǵylǵan úılerge kommýnaldyq-ınjenerlik júıelerdi tartyp ári qosýǵa ruqsat bergenin, osylaısha paıdalanýǵa berilmegen úılerge qonystanýǵa múmkindikti ádeıi berip otyrǵanyn alǵa tartyp otyr.
«Buǵan qatysty bólek qylmystyq is qozǵaýǵa bolady. Zańsyz soǵylǵan úıge memleket esebinen kommýnaldyq qyzmet túrlerin qosyp berý – bıýdjettiń aqshasyn shashý. Sebebi 2020 jyldyń 28 jeltoqsany kúni BQO sotynyń sheshimi shyqqan. Onda Oral qalasynyń 3 qaýlysy da zańsyz shyǵarylǵany aıtylǵan. Demek sol qaýly shyqqan sátten bastap, kommýnaldyq júıelerdi ornatatyn mekemeler jumysyn sol sátte toqtatýy kerek. Sottyń sheshimin oryndamasa zańnyń ústemdiginiń máni nede?
Elektr energııa, ystyq jáne sýyq sý, káriz júıesi zańsyz tartylǵan ári qosylǵan. О́kinishke qaraı buǵan jergilikti prokýratýra da lám-mım deı almaǵan. Kommýnaldyq qyzmet túrleri berilgendikten, sony paıdalanǵan qurylys kompanııasy ári qaraı páterlerdi sata bastaǵan.
Búgin sotta «Sıalkovskıı» turǵyn úı kesheniniń tek bir ǵana úıine qatysty daýdyń órbip jatqany, óıtkeni bas-aıaǵy 4 úıdiń tek bireýine adamdar zańsyz qonystanyp alǵany, al taǵy bir úı sanıtarlyq qorǵaý aımaǵyna kirmeıdi, qalǵan eki úı bolsa jarym-jartylaı ǵana salynǵany aıtyldy.
«Negizi bul sottaspaı-aq sheshiletin másele. О́ıtkeni, Ermenovanyń qaramaǵyndaǵy jer telimi bólip, rásimdeýge bolatyn jer. Sondyqtan, sotqa kelip shý shyǵaryp júrgen 1-úıdiń turǵyndaryna bul máseleniń qatysy joq. О́ıtkeni, olar 100 metrlik aýmaqqa kirmeıdi. Tek 2-úıge qatysty. Al 3 jáne 4-úıdiń qurylysy múldem bitpegen. Al sot prosesine kelip júrgenderdiń basym bóligi – osy 1-úıdiń turǵyndary. Negizi Ermenova jerdi bólip, áldeqashan ol azamattarǵa úıine zańdy túrde qujat berýge múmkindigi bar edi. Muny turǵyndardyń ózi de, kompanııa da talap etpeıtin bolyp tur. Ermenova osy turǵyndardy paıdalaný arqyly zańsyz salynǵan ózge de úılerdi zańdastyrǵysy keledi. «Kýbleı» zaýytynyń jaǵdaıy barlyq ádiletsizdiktiń detonary bolýy múmkin», dedi zańger Baqytjan Bazarbek.
