Áıelder arasyndaǵy Qazaqstannyń birinshi raketkasy Elena Rybakına 2022 jyldy 21-orynmen qorytyndylaıdy. Ol bıylǵy qańtar aıynda jarııalanǵan reıtıngte 14-orynda turǵan edi. Al Iýlııa Pýtınseva álemdik reıtıngte úsh saty joǵarylap, 51-orynǵa kóterildi. Pýtınseva 2022 jyldy 42-orynmen bastaǵan-dy. Juptyq synda óner kórsetetin Anna Danılına reıtıngtegi 11-ornyn saqtap qaldy. Anna qańtar aıynda uıymdastyrylǵan «Úlken dýlyǵa» sanatyndaǵy alǵashqy iri jarys – Aýstralııa ashyq chempıonatynyń juptyq básekesinde fınalǵa deıin jetkenin tennıs jankúıerleri umyta qoımaǵan bolar.
Erler arasyndaǵy reıtıngke toqtalar bolsaq, Qazaqstannyń birinshi raketkasy Aleksandr Býblık jyldy 37-orynmen aıaqtady. Ol qańtar aıyndaǵy tizimde 36-satyda turǵan edi. Sondaı-aq jerlesterimizden Tımofeı Skatov (142-oryn), Mıhaıl Kýkýshkın (188) jáne Beıbit Juqaev (308) óz kórsetkishterin jaqsartty.
