Pavlodar oblysy ákimdigine qarasty eki basqarmaǵa jańa basshy taǵaıyndaldy

ASTANA. 9 maýsym. Pavlodar oblysynyń ákimi Qanat Bozymbaevtyń ókimimen oblystyq kásipkerlik, saýda jáne týrızm basqarmasyna Aleksandr Babenko, al sáýlet jáne qala qurylysy basqarmasyna Andreı Balashev basshy bolyp taǵaıyndaldy. Bul týraly «QazAqparat» habarlady. Pavlodar oblysynyń týmasy, joǵary bilimdi, Qaraǵandy KSRO IIM Joǵary mektebin jáne Reseı Federasııasy úkimetiniń janyndaǵy Halyqtyq sharýashylyq akademııasyn támamdaǵan Aleksandr Babenko eńbek jolyn Ishki ister mınıstriliginiń qyzmetkeri retinde bastaǵan. Sondaı-aq, 20 jyldan astam kásipkerlik jáne bıznes salasynda eńbek etti. Budan bólek, A. Babenko Innovasııalyq Eýrazııalyq ýnıversıtettiń «Menedjment» kafedrasynyń professory. Ol osy taǵaıyndaýǵa deıin oblystyq kásipkerlik, saýda jáne týrızm basqarmasy basshysynyń orynbasary bolǵan. Oblystyq sáýlet jáne qala qurylysy basqarmasynyń basshysy bolyp bekitilgen Andreı Balashev buǵan deıin Pavlodar qalasynyń sáýlet jáne qala qurylysy  bólimin basqarǵan. Pavlodar oblysynyń týmasy, joǵary bilimdi, 2003 jyly ınjener-qurylysshy mamandyǵy boıynsha S. Toraıǵyrov atyndaǵy Pavlodar memlekettik ýnıversıtetin úzdik aıaqtaǵan A.Balashev eńbek jolyn «Arhproekt-T» JShS-da jobalýshy bolyp bastaǵan. Sodan keıin oblystyń sáýlet jáne qala qurylysy basqarmasy bóliminiń bas mamany, bastyǵy, Pavlodar qalasynyń bas sáýletshisi mindetterin atqarǵan. Sondaı-aq, Qanat Bozymbaevtyń ókimimen oblys ákimi apparaty basshysynyń orynbasary bolyp Aǵybaı Ámrın taǵaıyndaldy. Ol budan buryn oblys ákimi apparaty uıymdastyrý-ınspektorlyq bóliminiń jetekshisi qyzmetinde bolǵan. Joldybaı Bazar. Derekkóz: «QazAqparat». Foto: News.nur.kz.