Shahmat jankúıerleriniń esinde bolsa, byltyr da jyl basyn súıinshi habarmen bastap, oqyrmandarymyzdy qýantqan edik. Polshanyń bas shahary – Varshavada ótken shahmattyń blıs túrinen Bıbisara Asaýbaeva tuńǵysh ret áıelder arasyndaǵy álem chempıonatynda top jarǵan-dy. Mine, Bıbisara bıyl da sol bıiginen kórinip, qatarynan ekinshi jyl shahmat álemindegi teńdessiz sportshy atandy. Sondaı-aq ol byltyr qazaqstandyq shahmatshylar arasynan eresekter arasyndaǵy dúnıejúzilik dodada daralanǵan tuńǵysh sportshy atanyp, əlem chempıonattarynda eń jas chempıon atanǵan alǵashqy shahmatshy retinde tarıhqa óz atyn altyn áriptermen jazdyrdy.
Halyqaralyq shahmat federasııasy (FIDE) men Qazaqstan shahmat federasııasy uıymdastyrǵan Almatydaǵy álem birinshiligine dúnıejúziniń 46 memleketinen 178 er men 98 áıel shahmatshy baq synady. Jer-jahannyń eń tańdaýly grossmeısterleri jınalǵan álemdik dodanyń sońǵy týryna deıin B.Asaýbaeva rapıdten álem chempıony qytaılyq Tan Chjýnımen ıyq tirestirip, týrnır kestesiniń birinshi ornyn ózara bólisip turǵan edi. Sheshýshi, sońǵy týrda otandasymyz jeńiske jetip, qytaılyq shahmatshy qarsylasyna jol bergennen keıin, álem birinshiliginiń jeńimpazy men kúmis júldegeriniń esimi belgili boldy. Al qola júlde reseılik Polına Shývalovaǵa buıyrdy.
Erler arasyndaǵy básekede norvegııalyq Magnýs Karlsen rapıd jáne blısten álem chempıony atanyp, byltyrǵy ataǵyn qorǵaı bildi. Al rapıdten qyzdar arasyndaǵy altyndy qytaılyq Tan Chjýnı ıelense, kúmis júlde otandasymyz Dınara Sádýaqasovaǵa buıyrǵan edi.
