Merki bolmaı tur jerdiń kórki

Shynynda, jambyldyqtar: «Merki – jerdiń kórki» degen sózdi maqtanysh­pen aıtady. Bul sóz, árıne, aq bas Alataýmen aralasyp jatqan Merki jeriniń keremet kórki men ásem tabıǵatyna baılanys­ty aıtylǵany anyq. Eteginde jatqan eldiń de sáni bólek. Merki aýdany aýyldarynyń qalyń tal-teregi, taza aýa, salqyn samaly, taýdan arqyrap aqqan sýy tynysyńdy ashady, kóńilińdi kóteredi. Basqa jaqqa bara qalsa «Bizdiń elde osyndaı kórikti, keremet jer bar», dep jambyldyqtar da aýzyn toltyryp aıtýdan esh jalyqqan emes. Al, Merki shıpajaıynyń dańqy, ataǵy búginde shartarapqa belgili. Áıtse de, ádemi dúnıege de tazalyq pen uqyptylyq kerek. Sonda ǵana kózi ashylady. Ústińdegi qymbat kostıým-shalbaryńnyń jyltyraǵanynan ne paıda, eger ol kir, las, bylǵanysh bolsa... Alla taǵalamnyń adam balasyna bergen osynaý keremet syıyn merkilikter mensinbeı júrgen sııaqty. Kóktemniń kózi jylt etkeli beri búkil el jappaı senbilikke shyǵyp, tóńiregin tazalap jatyr. Kórshi Qordaı aýdanynda osy ýaqyt ishinde 28 myń adam qolyna tyrma, sypyrǵy ustap, tazalyqqa atsalysypty. Al, Merki aýdanynda aýla tazalaýǵa nebári 1,5 myń adam shyǵypty. Jambyl oblystyq energetıka jáne kommýnaldyq sharýashylyq basqarmasynyń basshysy Muhtar Tóleýlıevtiń aıtýyna qaraǵanda, búginde óńirde 500 konteınerlik alań jáne 2 808 jáshik bar. Biraq, Merki jáne Moıynqum aýdandary boıynsha konteınerlik alańdar men jáshikter qarastyrylmaǵan. Merki aýdanynyń ákimi Baqtııar Kópbosynov bul másele­ge endi qarjy qarastyrylǵanyn, kon­teı­nerlerdi áli alyp úlgermegenin aıtyp aqtaldy. Sonda osynshama qalyń el osy ýaqytqa deıin qoqystaryn qaıda tastaǵan, qarjy nege endi qarastyrylyp otyr? Osy ýaqytqa deıin arnaıy jáshik bolmaǵan soń el jan-jaǵynyń bárin qoqyshana etip tastaǵany anyq qoı. Eń qyzyǵy, Baqtııar Kópbosynov kógal­dandyrýǵa naqty qansha qarjy bó­lingenin jaqsy bilmeıtin bolyp shyqty. Aýyl-aımaqtyń tazalyǵyna baılanys­ty ótken úlken jıynda Jambyl ob­­l­ysynyń ákimi Kárim Kókirek­baev Merkiniń ákiminen kógaldandyrý má­se­le­sine qansha qarjy bólingenin sura­ǵan­da, ol «8 mln. 200 myń teńge» dep jaýap berdi. Al, shyn máninde 28,8 mln. teńge bólingen eken. Onyń osy ýaqytqa deıin 2,5 mln. teńgesi ǵana ıgerilipti. Soǵan qaraǵanda, «Ata dańqymen sóz óter, mata dańqymen bóz óter» degen, aý­dan ákimi Merkiniń kórkin puldap, kúl-qoqys, qaldyq ásem tabıǵattyń, kók-jasyl dúnıeniń arasynda kórinbeı qala­dy dep arqany keńge salyp júrgen sııaqty. Oralhan DÁÝIT, «Egemen Qazaqstan». Jambyl oblysy.