Burynǵy ákim Abat Kóbenov pen onyń advokaty apellıasııalyq shaǵymda bas bostandyǵynan aıyrý jazasyn aıyppulǵa aýystyrý týraly ótinish bildirgen. Advokat sottalýshy óz kinásin tolyq moıyndaǵanyn jáne ókingenin, zalaldy ótegenin, sondaı-aq onyń asyraýynda qart anasy, úsh balasy bar ekenin, olardyń bireýi sozylmaly psıhıkalyq aýrýmen aýyratynyn atap ótti.
Apellıasııalyq sotta sotqa deıingi tergeý men birinshi satydaǵy sot buzýshylyqsyz ótkeni anyqtaldy. Kóbenov sottalǵan baptyń sanksııasy bas bostandyǵynan aıyrýdan basqa, urlanǵan múlik somasynan jıyrma esege deıin aıyppul túrinde jaza qarastyrady. Qorǵaýdyń dálelderin tyńdap, jeńildetetin jaǵdaılardy eskere otyryp, sot alqasy sottalýshynyń apellıasııalyq shaǵymyn qanaǵattandyrý jáne bas bostandyǵynan aıyrý jazasyn aıyppulǵa ózgertý týraly sheshim qabyldady.
Osylaısha Aqtóbe qalasynyń №2 soty QR QK 190-baby 3-bóliginiń 2-tarmaǵy boıynsha sottalǵan Abat Kóbenovke qatysty úkimdi ózgertip, 13 839 150 teńge mólsherinde aıyppul saldy. Sondaı-aq ol memlekettik qyzmette, jergilikti ózin-ózi basqarý organdarynda, Ulttyq bankte, kvazımemlekettik sektor sýbektilerinde qyzmet atqarý quqyǵynan ómir boıyna aıyryldy.
Eske sala ketsek, 2022 jyldyń 26 qazanynda Aqtóbe qalasy Almaty aýdanynyń burynǵy ákimi Abat Kóbenov alaıaqtyq jasaǵany úshin úsh jylǵa bas bostandyǵynan aıyryldy. Ol Aqtóbe ákimdigi apparatynyń basshysy laýazymynda bola tura, 2020 jyly tanysyna jer ýchaskesin berý syltaýymen odan 1 383 000 teńge kóleminde para almaqshy bolǵan.
