«Qurmetti azamattar! О́zderińiz biletindeı, aýa raıy Jańa jyl merekesinen bastap buzyla bastady, eń qıyn kúnder qańtardyń 3-i men 4-ne keldi. Elimizdiń 9 óńirinde respýblıkalyq jáne oblystyq mańyzy bar avtojoldardyń 79 ýchaskesinde kólik quraldarynyń qozǵalysyna ýaqytsha shekteý engizildi. Osy jaǵdaılarda polısııa qyzmetkerleri avarııalyq-qutqarý jáne jol qyzmetterimen birlesip, qaýipsizdikti qamtamasyz etý úshin avtokólikterdiń qaýipti jol ýchaskelerine shyǵýyna jol bermeý boıynsha sharalar qabyldady», dedi Qaısar Sultanbaev.
Onyń aıtýynsha, jekelegen júrgizýshiler polısııa blok-beketterinde engizilgen qozǵalysty shekteý sharalaryn elemeı, qaýipti jol ýchaskelerine shyǵyp ketip otyrdy. Kóp jaǵdaılarda osy kólik quraldary qar kóshken jerlerde qalyp qoıyp, olardy evakýasııalaý men ómirlerin qutqarý úshin polısııa jáne tótenshe jaǵdaı qyzmetkerleri bastaryn qaterge tigip, resýrstardy shyǵyndaýǵa májbúr boldy.
«Júrgizýshiler ózderi úshin ǵana emes, jolaýshylar úshin de jaýapty ekenderin túsiningeni durys. Máselen, 4-5 qańtarda Qaraǵandy oblysynyń Balqash qalasy mańynda avtojoldyń jabyq ýchaskesinde 400-den astam kólik quraldarynda 1,5 myń adam jınalǵan. Tipti, osy ýchaskede 5 avtokólik qar úıindisine batyp, keri qaıtqan. Osyǵan qaramastan jekelegen júrgizýshiler polısııa jáne ákimdik qyzmetkerleriniń zańdy talaptaryna ózderin agressıvti jáne dóreki ustap, balaǵattaýǵa jol berip, kúsh qoldanýǵa deıin bardy», dedi ol.
Jol jıegi arqyly ótpek bolǵan Hyundai Creta avtokóliginiń júrgizýshisi polısııa qyzmetkerleriniń zańdy talaptaryna baǵynbaǵan. Oǵan qatysty Ákimshilik kodekstiń 667-baby boıynsha ákimshilik hattama toltyrylyp, is ákimshilik sotqa joldandy.
Osyǵan uqsas jaǵdaı 4 qańtarda respýblıkalyq mańyzy bar Omby – Maıqapshaǵaı avtojolynda Abaı oblysynyń Boǵas, Kókpekti aýyldary mańynda boldy. Polısııa qyzmetkerleriniń zańdy talaptaryna baǵynbaǵany jáne qaýipti jabyq ýchaskege shyqqany úshin Lada 21703 jáne Toyota Avalon markaly avtokólik quraldarynyń eki júrgizýshisine qatysty Ákimshilik kodekstiń 667-baby boıynsha ákimshilik hattama toltyryldy.
«Aýa raıy nasharlaǵan kezde sms-habarlamalar, ınternet-arnalar jáne teleradıo habarlaryn taratý arqyly turǵyndardyń avtojoldardaǵy jaǵdaılar týraly ýaqytyly habardar etiletindigin atap ótý qajet. Sóz sońynda kólik quraldary júrgizýshilerin tasjolǵa shyǵaberisti japqan polısııanyń zańdy talaptaryna baǵynbaǵan kezde Qazaqstan Respýblıkasynyń qoldanystaǵy zańnamasyna sáıkes 30 AEK nemese 103 500 teńge aıyppuldan 15 táýlikke deıin ákimshilik qamaqa alý jazasy bar ekendigin eskertkim keledi», dedi ol.
