Elimizdiń damýy men órkendeýine qýatty serpin

Prezıdent pochtasynan Eýrazııalyq ekonomıkalyq odaq týraly shartqa qol qoıylýyna baılanysty Elbasynyń atyna hattar men jedelhattar kelip tústi, dep habarlady Prezıdenttiń baspasóz qyzmeti. Astanada Joǵary Eýrazııalyq ekonomıkalyq keńestiń memleket basshylary deńgeıindegi otyrysy ótýine jáne Eýrazııalyq ekonomıkalyq odaq týraly shartqa qol qoıylýyna baılanysty Qazaqstan Prezıdentiniń atyna quttyqtaýlar kelip túsýde. Eýrazııalyq ekonomıkalyq odaq týraly shartqa qol qoıylýyna baılanysty Qazaqstan Respýblıkasy Memlekettik syılyǵynyń laýrea­ty S.Dosanov óz quttyqtaýyn joldady. «Qazaqstan, Reseı jáne Be­larýs prezıdentteriniń osy tarıhı qujatqa qol qoıýy bizdiń elimizdiń odan ári damýy men órkendeýi úshin qýatty serpin bolady»,  dep atap ótken jazýshy. Eýrazııalyq ekonomıkalyq odaq­ty qurýǵa Qaraǵandy memle­kettik tehnıkalyq ýnıversıtetiniń stýdentteri men oqytýshy-pro­fes­­sorlary atynan osy oqý orny­nyń rektory A.Ǵazalıev qoldaý bildirgen. «Eýrazııalyq odaq qurý ıdeıa­syn Siz tuńǵysh ret osydan 20 jyl buryn usyndyńyz. Búginde eýra­zııalyq yqpaldastyq is júzine asýda jáne óziniń mańyzdylyǵyn dáleldeýde»,  delingen hatta. «Alageum Electric» kompanııasy baqylaýshylar keńesiniń tóraǵasy S.Qojabaev  óz kezeginde saýda baılanystary men taýar óndirýshiler yqpaldastyǵyn damytý úshin EAEO qurýdyń tıimdiligin atap ótken. «Yqpaldastyq úderisterin tereńdetý biz úshin paıdaly jáne bizdiń múddelerimizge saı. Elektrli mashına jasaý salasynda jumys isteı júrip, biz naryqqa básekege qabiletti elektr-tehnıkalyq ónimderdi shyǵarý arqyly syrtqy saýda baılanystary qarqynyn odan ári arttyra túsetin bolamyz», dep jazady avtor. «Saýts-oıl» munaı-gaz kom­pa­nııasynyń prezıdenti S.Seıt­janov túrli salalar úshin yqpal­dastyqtyń mańyzdylyǵyn ataı otyryp, shartqa qol qoıýdy táýelsiz Qazaqstannyń damýyndaǵy jańa kezeńiniń bastapqy núktesi dep ataǵan. «Bizdiń kásiporyndarymyzdyń biri  –  «Standart Sement» JShS 2013 jyly daıyn ónim shyǵarý boıynsha óziniń jobalyq qýatyna jetti. Buǵan Keden odaǵy men Birtutas ekonomıkalyq keńistiktiń jumysy yqpal etkeni sózsiz, óıt­keni, bizdiń ónim kórshi elderde úl­ken suranysqa ıe», deıdi S.Seıt­janov. Almatynyń turǵyny M.Jaýa­rov óz hatynda Memleket basshysyn Eýrazııalyq ekonomıkalyq odaq týraly shartqa qol qoıy­lýy­men quttyqtap, osy birlestiktiń sátti damýyn tilegen. Ońtústik Qazaqstan oblysynyń zııaly qaýym ókilderi Eýrazııalyq ekonomıkalyq odaq qurý otandyq kásipkerlik úshin zor múmkindikter usynatynyn atap ótken. «Siz bastamashylyq etken tarıhı jobalardyń bári búginde ómirsheńdigin tanytýda. Qazirdiń ózinde eleýli nátıje kórsetip jatqan Keden odaǵy sondaı mysaldardyń biri bolyp sanalady»,  deıdi hat ıeleri.