Kórmege sýretshiniń 2020-2021 jyldary salynǵan 111 týyndysy usynyldy. Bulardy avtordyń shyǵarmashylyǵyndaǵy biraz ýaqyt úzilisten keıingi qaıta týǵan dúnıeler dep aıtýǵa bolady. Ár kartına – sanany selt etkizer obrazǵa toly. Ýaqyt pen keńistiktiń úılesimin taba bilgen týyndylardan kórkemdik pen syrshyldyqtyń lebi esedi. Sondaı-aq kórmeniń «Qańbaq» dep atalýy da tegin emes. Bul eńbek qylqalam sheberiniń buǵan deıingi tynys-tirshiligi men oı-tolǵanystaryn bir túıindep, odan ári shyǵarmashylyǵyn damytýǵa negiz bolǵan.
Mádenı is-sharanyń ashylýynda ónertanýshy, IýNESKO janyndaǵy Halyqaralyq kórkemdik synshylar qaýymdastyǵynyń (AICA) múshesi, Qazaqstannyń eńbek sińirgen qaıratkeri Kamılla Lı jáne taǵy basqa zııaly qaýym ókilderi men qoǵam qaıratkerleri sóz alyp, kórmeniń mańyzy men mazmunyna toqtaldy.
Sondaı-aq kórme aıasynda «Sýretshi jáne ýaqyt» atty dóńgelek ústel májilisi uıymdastyrylyp, oǵan qatysýshylar Jámılá Takenniń shyǵarmashylyǵy men qazirgi beıneleý óneriniń damýy jaıynda salmaqty oı qozǵady.
Aıta keteıik, Jámılá Taken – Reseı Eýrazııalyq sýretshiler odaǵynyń «Emosııalar» halyqaralyq óner festıvaliniń birneshe dúrkin laýreaty. Sonymen qatar halyqaralyq deńgeıdegi sımpozıýmdar men art-forýmdarǵa qatysyp, birqatar joǵary marapatqa ıe bolǵan.
