Eýrazııalyq ıntegrasııanyń elimiz úshin tıimdi jaqtary kóp

ASTANA. 10 maýsym. Eýrazııalyq ekonomıkalyq odaq qolaıly ınvestısııalyq ahýal jáne ózge de qajetti júıelerdi qalyptastyrýǵa jol ashady. Oral qalasyndaǵy Jáńgir han atyndaǵy Batys Qazaqstan agrarlyq-tehnıkalyq ýnıversıteti ekonomıka jáne bıznes fakýltetiniń dekany, ekonomıka ǵylymdarynyń doktory, professor Raýshan Ǵabdýalıeva osyndaı pikirde. Bul týraly «QazAqparat» habarlady. Raýshan Ǵabdýalıeva: «Eýrazııalyq ekonomıkalyq odaqtyń dúnıege kelýimen shıkizattyq, adamı, tehnologııalyq túrdegi ortaq strategııalyq aktıvter bazasy, ıaǵnı, álemdik ekonomıkanyń saqtandyrý júıesi quryldy. Búginde álemde ekonomıkalyq, kedendik jáne erkin ekonomıkalyq aımaqtar dep sanalatyn 300-ge tarta memleketaralyq qurylymdar jumys isteıdi. Eýropa elderiniń Eýroodaǵy da sondaı qurylymnyń biri. Azýyn aıǵa bilegen alyp derjava AQSh-tyń ózi NAFTA degen uıymǵa múshe. Bul uıymdy bir qurlyqta ornalasqan AQSh, Kanada, Meksıka ózara erkin saýda júrgizý úshin qurǵan. «Eýrazııalyq ekonomıkalyq odaq elimizdiń táýelsizdigine nuqsan tıgizbeı me?» degen saýaldyń kópshiliktiń kókeıinde júrgeni belgili. Alaıda, jańa qurylymnyń tek qana ekonomıkalyq odaq ekenin esten shyǵarmaý kerek. Yqpaldastyqtyń basty qaǵıdattary ekonomıkalyq pragmatızmge jáne ashyqtyq pen teńdikke negizdelgen», – dedi. Ǵalymnyń aıtýynsha, bul birlestik 17 mıllıon halqy bar Qazaqstannyń kásipkerleri úshin óte tıimdi. Olar óz ónimderin molynan shyǵaryp, osy keńistikke usyna alady. Sondaı-aq, ol: «Kásipkerlik úshin Eýrazııalyq ekonomıkalyq odaqqa múshelik oǵan qatysýshy elderge biryńǵaı kóliktik júıeni, qolaıly ınvestısııalyq ahýal jáne ózge de qajetti júıelerdi qalyptastyrýǵa jol ashady. Aıtalyq, Kedendik odaq jaǵdaıynda kásipkerler odaq sheńberinde júkterdi tasymaldaýdyń birshama jeńildegenin sezindi. Keden odaǵy qurylǵannan bergi ýaqytta  Qazaqstan ónerkásibiniń óńdeý salasyna quıylǵan shetel ınvestısııasynyń kólemi eki esege, 2009 jylǵy 1,8 mıllıard dollardan 2012 jyly 3,4 mıllıard dollarǵa deıin ósti. Bul kórsetkishter, árıne, Qazaqstannyń ınvestısııalyq tartymdylyǵyn aıqyn kórsetedi. Odan basqa Eýrazııalyq ekonomıkalyq odaq jónindegi kelisimshartta kez kelgen qatysýshy memlekettiń ústemdik etýine jol berilmeıdi. Onda teń quqyqtyq, qatysýshy taraptardyń ulttyq múddelerin esepke alý qamtamasyz etilgen. Kelisimshartta strategııalyq mańyzdy máselelerdi jáne barlyq deńgeıdegi sheshimderdi qabyldaýda ortaq kelisimge kelý tetikteri kórinis tapty», – dedi. Joldybaı Bazar. Derekkóz: «QazAqparat». Foto: egemen.kz.