Senat Tóraǵasy bıyl Parlament jańa jaǵdaıda jáne jańa talaptar men mindetterdi eskere otyryp jumys isteıtinine toqtaldy. Sondaı-aq Senat óńirlerdiń múddesin bildiretin ınstıtýt bolýǵa tıis ekenin atap ótti. Soǵan baılanysty Palata Spıkeri depýtattarǵa Senat is-sharalary barysynda azamattardy tolǵandyratyn máselelerdi belsendi kóterýdi tapsyrdy.
Aldaǵy otyrysta Memleket basshysy Qasym-Jomart Toqaev usynǵan kandıdattardy Joǵarǵy Sot sýdıalary qyzmetinen bosatý máselesi zerdelenedi. Sondaı-aq «Qazaqstan Respýblıkasynyń Tuńǵysh Prezıdenti – Elbasy týraly» Qazaqstan Respýblıkasy Konstıtýsııalyq zańynyń kúshi joıyldy dep taný týraly» Konstıtýsııalyq zańnyń jobasy boıynsha Parlament Palatalarynyń birlesken komıssııasynyń múshelerin jáne Senattan qosymsha baıandamashy saılaýdy josparlap otyr.
Sonymen qatar depýtattar «Qazaqstan Respýblıkasynyń Úkimeti men Shveısarııa Konfederasııasynyń Federaldyq Keńesi arasyndaǵy baǵaly metaldardan jasalǵan buıymdardaǵy synamalyq tańbany ózara taný jónindegi kelisimdi ratıfıkasııalaý týraly» zańdy qaraıdy. Onyń erejeleri elder arasyndaǵy yntymaqtastyqty ońaılatý úshin baǵaly metaldardan jasalǵan buıymdardaǵy synamalyq tańbany ózara tanýdy kózdeıdi. Bul rette buıymdar osy kelisimniń talaptary men ımporttaýshy taraptaǵy memlekettiń ulttyq zańnamasyna sáıkes kelýge tıis.
Kún tártibindegi taǵy bir másele - «Qazaqstan Respýblıkasynyń Úkimeti men Qytaı Halyq Respýblıkasynyń Úkimeti arasyndaǵy azamattyq áýe kemelerin avıasııalyq izdestirý jáne qutqarý salasyndaǵy yntymaqtastyq týraly kelisimdi ratıfıkasııalaý týraly» zań. Qujat apatqa ushyraǵan ushaqtardyń jolaýshylary men ekıpajdaryn izdeý men qutqarýda memleketter arasyndaǵy yntymaqtastyqty odan ári kúsheıtýge baǵyttalǵan.
Sondaı-aq Bıýro músheleri Májilisten kelip túsken zańdardy Senattyń turaqty Komıtetterine bólip berdi.
Máýlen Áshimbaev otyrysta Bıýro múshelerine Senat Apparatynyń jańa basshysyn tanystyrdy. Bul qyzmetke Spotkaı Maksım Aleksandrovıch taǵaıyndaldy.
Al buǵan deıin Apparat basshysy bolyp kelgen Álııa Raqysheva óz ótinishi boıynsha qyzmetinen bosatyldy. Senat Tóraǵasy búkil depýtattyq korpýstyń jáne óz atynan Álııa Raqyshevaǵa Parlamenttiń zańnamalyq jumysyn jetildirýge qosqan zor úlesi úshin alǵys aıtyp, Senattyń Qurmet gramotasyn tabys etti.
