О́ner • 10 Qańtar, 2023

Astanadaǵy Vena festıvali

460 ret
kórsetildi
2 mın
oqý úshin

«Astana Opera» teatrynyń kórermenderi úshin qańtar aıy qyzyqqa toly bolmaq. Bir aı boıy munda Vena klassıkalyq shyǵarmalarynyń festıvali ótedi. Oǵan Japonııa, Mońǵolııa, Izraıl, Estonııadan shaqyrylǵan mýzykanttar men atalǵan óner ordasynyń shyǵarmashylyq ujymy qatysyp, klassısızm dáýiriniń jaýharlaryn oryndaıdy.

Astanadaǵy Vena festıvali

Festıvaldiń kórkemdik jetekshisi, belgili dırıjer Abzal Muhıtdınniń aıtýynsha, mádenı is-sharaǵa álemge tanymal jas talanttar qatysady.

– Máselen, japonııalyq dırıjer Vena konservatorııasyn támamdap, Mýzıkferaın konsert zalynda fılarmonııalyq orkestrge dırıjerlik etse, Estonııadan keletin maestro «Travıataǵa» dırıjer boldy. Osydan-aq olardyń kásibı sheberligi joǵary maman ekenin bilesiz. Biz festıval repertýaryn ývertıýra stıli turǵysynda jáne tanymal sımfonııalar men konsertter qaǵıdaty boıynsha tańdadyq. Al aspaptyq konsertterdi bizdiń teatrdyń úz­dik mýzykanttary oryndaıdy, – dedi ol.

XVIII ǵasyrda Aýstrııa as­tanasynda klassıkalyq mýzyka sharyqtaý kezeńin bastan keshti. Ásirese Vena mektebinen shyqqan uly kompozıtorlar – Gaıdnnyń bekzat ásemdigi, Mosarttyń tańǵalarlyq áýe­ni, Bethovenniń qýatty qoltań­basy tyńdarmandaryn erekshe áserge bóledi. Búginde Vena klassısızminiń tańdaýly mýzykalary eshkimdi beı-jaı qaldyrmaıdy.

Aıta keteıik, bas qala tó­rinde saltanat quratyn Ve­na klas­sıkasynyń festı­vali K.Baıseıitova atyndaǵy Kame­ralyq zalda 13 qańtarda bas­talady. Bul keshte teatrdyń sımfonııalyq orkestri mońǵo­lııalyq dırıjer Mýnh­baıar Erdenebaatardyń jetekshi­ligimen óner kórsetedi. Solıst – «Astana Operanyń» birinshi skrıpkasy Baǵdat Ábilhanov. 19 qańtarda teatr orkestriniń mýzykanttary estonııalyq maes­tro Hanno Mıolderkıvıdiń je­tekshiligimen sahnaǵa shy­ǵady. Munda Damılıa Mah­pırova goboıda jeke oryndaıdy. Sondaı-aq 25 qańtar­da «Astana Operanyń» Úlken zalynda teatrdyń sım­­fo­nııa­lyq orkestri men hory dırıjer Abzal Muhıt­dınniń je­tekshiligimen V.A.Mo­sart­tyń shuraıly shy­ǵar­ma­lary – №40 sımfonııa men Rekvıemdi usynady. Jeke partııalardy oryndaıtyn­dar: soprano – Jámıla Jar­qymbaeva, alt – Saltanat Muratbekova, tenor – Ramzat Balakıshıev, bas – Shyńǵys Ra­sylhan. Bas hormeıster Erjan Dáýitov. 31 qańtarda Izraılden kelgen dırıjer Arık Goldshteın, solıst – pıanıst Dolores Úmbetálıeva orkestr ártisterimen mazmun­dy baǵdarlama tartý etedi. Al 7 aqpandaǵy festıvaldiń qorytyndy konsertinde maes­tro Kokı Gongýı Iаng (Japo­nııa-Qytaı) qonaq bolady. Ol sol kúngi keshte elordalyq teatr­dyń sımfonııalyq orkes­trine jetekshilik jasaıdy.

Sońǵy jańalyqtar