Aqparattyq keńistik aqıqatqa qurylady

Qazaqstandaǵy dinı ahýaldy turaqty dep aıtýǵa jetkilikti negiz bar. Sońǵy málimetter boıynsha, elimizde 18 konfessııany quraıtyn 3449 dinı birlestik qyzmet atqarady. Bul 2011 jylǵy kórsetkishten anaǵurlym az. Sebebi, «Dinı qyzmet jáne dinı birlestikter týraly» zań talaptaryna sáıkes, dinı birlestikter qaıta tirkeýden ótkizilip, Qazaqstannyń konfessııalyq keńistigi retke keltirildi. Elbasy Nursultan Nazarbaev «Qazaqstan-2050» Strategııasy – qalyptasqan memlekettiń jańa saıası baǵyty» atty Joldaýynda eldiń dástúrleri men mádenı normalaryna sáıkes keletin dinı sana qalyptastyrýymyz qajettigin ataı kelip, dindi zaıyrly qoǵamymyzdyń ajyramas bóligi retinde baǵalady. Sondyqtan, elimizdegi dinı qatynastardy odan ári damytýǵa quzyrly memlekettik mekemeler, qoǵamdyq uıymdar men buqaralyq aqparat quraldary árqashan múddelilik tanytady. Bul oraıda, ótken juma­da Býrabaıda Qazaqstan Respýb­lı­kasy Din isteri agenttigi men «Ulaǵat» mádenıet jáne damý qory birlesip ótkizgen «Halyq­tyń dinı saýattylyǵyn arttyrý boıynsha aqparattyq-túsin­dirý jumysynyń tıimdiligi» taqy­ry­byndaǵy respýblıkalyq ǵylymı-tájirıbelik konferensııasynyń tálimdik mańyzy zor bolǵandyǵyn atap kórsetkimiz keledi. Onyń jumysyna agenttik basshylyǵy men qyzmetkerleri, Astana jáne Almaty qalalarynyń, oblys­tardyń din isteri basqarma­larynyń basshylary, aımaqtyq aqparattyq-nasıhat toptarynyń músheleri, úkimettik emes uıymdar men BAQ ókilderi qatysty. Din isteri agenttigi tóraǵa­synyń orynbasary Ǵalym Shoı­kın kirispe sózinde dinı qyzmettegi memlekettik saıasattyń basym baǵyttaryna taldaý jasaı kelip, agenttik pen dinı basqarma tarapynan «Din taqyrybyn BAQ-ta jarııalaý boıynsha ádistemelik usynystar» jasalǵandyǵyna nazar aýdardy. Tilshiler qaýymy dinı máselelerdi kóterý barysynda osy usynystarǵa súıene alady. Bul BAQ erkindigine shekteý qoıý emes, kerisinshe, sala ókilderiniń durys baǵyt-baǵdar ustanyp, memlekettik saıasatty durys nasıhattaýyna septigin tıgizedi. Konferensııaǵa daıyndyq barysynda respýblıkalyq jáne aımaqtyq baspa basylymdarynda, elektrondyq aqparattyq quraldarda jáne ınternet resýrstarda jarııalanǵan materıal­darǵa kontent-saraptama ádisimen 116 BAQ-qa monıtorıngtik taldaý júrgizilipti. BAQ betterinde jaryq kórgen materıaldardyń sıpattyq kórsetkishine toqta­lar bolsaq, zaıyrly jáne konfessııalyq aqparat qural­darynda jarııalanǵan 2000-nan astam maqala din salasyndaǵy ózekti máselelerge arnalǵany aıtyldy. Ásirese, saraptamalyq-taldaý materıaldary kóbeıe túsken. Onda, negizinen eldegi dinı ahýalǵa, dinı ekstremızm men lańkestiktiń múmkin qaýipterin boljaý men taldaý, halyqtyń dinı-quqyqtyq saýatyn kóterý joldaryn izdestirýdi arqaý etken taqyryptar kóterildi. Konferensııada Aqmola jáne Ońtústik Qazaqstan oblysy din isteri basqarmasynyń bas­shylary S.Ybyraeva men B.Jalmurzaev, Pavlodar obly­syndaǵy «Konfessııaaralyq qatynastardy taldaý jáne damy­tý ortalyǵynyń basshysy G.Razdyqova, Din isteri agenttigi tóraǵasynyń keńes­shisi A.Ábdirásilqyzy, agenttik­tiń basqarma basshysy Á.Jýa­nysh­paeva, «Aqnıet» QB jetek­shisi A.Qımanov, L.N.Gýmılev atyndaǵy Eýrazııa ulttyq ýnıver­sıtetiniń dosenti K.Tyshhan jáne S.Seıfýllın atyndaǵy Qazaq agrotehnıkalyq ýnıversıtetiniń aǵa oqytýshysy A.Kenjeevtiń baıandamalary tyńdaldy. Onda BAQ-tardaǵy belsendiliktiń arta túskendigi atap ótilýimen qatar, elde qalyptasqan konfes­sııaaralyq kelisim men turaq­ty­lyqty nyǵaıtý, din atyn ja­mylǵan aǵymdar men lańkestik toptardyń zııandy áreketteriniń aldyn alý, dinı alaýyzdyqqa jol bermeý jolyndaǵy jýrnalıstik izdenisterdi ushtaı túsý jóninde usynystar ortaǵa salyndy. Basqosýdyń ekinshi bó­li­ginde aımaqtyq BAQ jýrna­lıs­terine arnalǵan semınar uıymdastyryldy. Baqbergen AMALBEK, «Egemen Qazaqstan». Aqmola oblysy.