Patrýldik polısııa batalonynyń ınspektorlary О́skemenniń kireberisindegi Sheshek asýynda shamadan tys júgi bar avtokólikti toqtatqan. Qujattaryn teksere kele, kólikti Kúrshim aýdanynyń 29 jastaǵy turǵyny basqaryp kele jatqany belgili bolady. Kólikte, sonymen qatar taǵy eki jolaýshy bolǵan.
Polıseıler kólik quralyn tekserý kezinde bólshektelgen janýardyń ushasyn kórgen. Alaıda etti tasymaldaý úshin berilgen tıisti qujattar joq bolyp shyǵady. Onymen qoımaı, kólikten myltyq tabylǵan. Anyǵy, jolaýshylardyń biri kólikke qaraı kele jatqan polısııa qyzmetkerlerin kórip, qarýdy qarǵa laqtyryp jibergen. Baıqamaı qalyp, jaza jeńildeıdi dep oılasa kerek.
Jaýap alý kezinde belgili bolǵany, kúdikti azamattar túngi saǵat ekide Ulan aýdanynyń Mamaı batyr aýylyna qaraı shyqqan. Sóıtip, olar jaqyn jerde jaıylyp júrgen jylqyny atyp alyp, etin bólshektegen. О́skemenge barar jolda janýardyń terisi men basyn laqtyryp jiberip, ári qaraı etti satý úshin jolǵa shyqqan.
Bul fakti boıynsha sotqa deıingi tergeý bastaldy. Quqyq qorǵaý qyzmetkerleriniń aıtýynsha, qylmystyq top buǵan deıin de Ulan aýdanynyń aýmaǵynda mal urlyǵymen aınalysqan eken. Qazirgi ýaqytta tergeý is-sharalary jalǵasýda. Kúdikti azamattarǵa qatysty Qylmystyq kodekstiń 188-1-baby, 2-bóligi boıynsha qylmystyq is qozǵalǵan. Zańda er adamdarǵa úsh jyldan jeti jylǵa deıin bas bostandyǵynan aıyrylý jazasy kózdelgen.
Shyǵys Qazaqstan oblysy
