Marqakól óńirinde túsken qar jylqynyń jonynan asady. Tebindeýi bylaı tursyn, qasat qardy baýyrlap jaryp ótýi muń bolyp tur. Malshylardyń aıtýynsha, mundaı qalyń qar sońǵy ret 2010 jyly túsken eken. Sodan beri Marqakóldiń taýly aımaq turǵyndary qalyń qar kórmegen. Qalyń dep otyrǵanymyz, eki metrge jýyq. Malshylar boran-shashyn basyla sala qarǵa qamalǵan Qambar ata tólin kúngeı jaqtaǵy qyrǵa baǵyttady. Qardyń qalyńdyǵy sondaı, jalǵyz soqpaqpen kerýendeı tizilgen jylqynyń qulaqtary ǵana qaraıady.
– Bıylǵy qys erekshe qatty bolyp tur. Malmen kún kórip otyrǵan turǵyndar úshin qıyn. Áneýgúni qar jaýdy, artynsha jańbyr jaýdy. Endi aıaz qysyp barady. Tebindegi jylqy malyn etekke túsirip jatyr el. Biraq aýyl mańynda jaıylym kóp emes. Onyń ústine, jańbyrdan soń qabyrshyq muz qatyp, tebindeı almaı qala ma dep alańdaımyz, – deıdi Marqakól óńiriniń turǵyny Ashat Ýanbaev.
Tebindeý múmkin bolmasa, shópke qoıýǵa týra keledi. Alaıda kóktemge deıin shóp jete me? Tórt túligi qystan qysylmaı shyqsa, aýyldyqtar úshin sol baqyt. Al Kúrshim aýdany basshylyǵynyń aıtýynsha, dabyl qaǵatyndaı dáneńe joq. Jem-shóp qys maýsymyna jetkilikti.
Aýyldyqtar aıtqandaı, qoradaǵy maldy amalyn taýyp qystan alyp shyǵady. Tek muz qatyp, tuıaq batpaı qalmasa bolǵany. Al túz tuıaqtylary qystan qalaı shyǵar eken?
– 2010 jyly qar qalyń túsip, buǵy-maral qatyp qalǵan. Bıylǵy qys ta ańdardy suryptaıyn dep tur. Biz qoradaǵy maldy qystan alyp shyǵatyn shyǵarmyz. Dala janýarlaryna qıyn bolyp tur, – dep alańdaıdy aýyldyq Ashat Ýanbaev.
Iá, aıtyp otyrǵan máselesi oryndy. Qoradaǵy malyn ǵana emes, dalanyń ańyn oılap otyratyn aýyl azamattary da bar. Shynynda da, dala ańdaryn aman alyp qalý úshin ormanshylar, qoryq qyzmetkerleri qandaı kómek kórseter eken dep, Marqakól memlekettik tabıǵı qoryǵynyń basshysy Tımýr Aıkenovke habarlasqanbyz. Onyń aıtýynsha, Marqakóldiń taýly aımaǵyna qar jylda qalyń túsedi. Biraq qalyń qar tuıaqty ańdar úshin asa qaýip tóndire qoımaıdy.
– Dala ańy ash qalmaıdy. Kól mańyna, taýly aımaqqa qar qalyń túskenimen Shanaǵaty jaqqa 20-30 santımetr ǵana jaýady. Buǵy, maral, elik kúzdiń kúni sol jaqqa qaraı aýyp ketedi. Shanaǵatyda «Staraıa Matveevka», «Qyraýly», «Keleńka» sekildi ýchaskeler bar. Ań sol jaqta júredi. Keıin kóktemde qaıta túsedi, – deıdi Marqakól memlekettik tabıǵı qoryǵynyń dırektory T.Aıkenov.
«Balapandy kúzde sanaıdy» demekshi, mal-jan qytymyr qańtar men aqpannan aman-esen shyqsa, naýryzda tabıǵat tosyn minez kórsete qoımas dep úmitteneıik.
Shyǵys Qazaqstan oblysy,
Kúrshim aýdany
