Joǵarydaǵy jańalyqty jergilikti jankúıerler jyly qabyldady. Sebebi Kavendıshtiń qandaı myqty sportshy ekenin jurt jaqsy biledi. 1985 jyldyń 21 mamyrynda Irlandııa teńizindegi Men aralynda dúnıege kelgen Marktiń velosportta baǵyndyrmaǵan belesi kemde-kem. Ol – Rıo-de-Janeıro Olımpıadasynyń kúmis júldegeri (2016 jyly), tórt dúrkin álem chempıony (2005, 2008, 2011, 2016), Dostastyq oıyndarynyń jeńimpazy (2006). Mark «Týr de Frans», «Djıro d’Italııa» jáne «Ispanııa Výeltasy» sekildi eń beldi ári mártebeli jarystardyń barlyǵynda eń úzdik sprınterge tıesili arnaıy syılyqtardy ıelendi. Sondaı-aq Fransııadaǵy kópkúndiktiń 34 kezeńinde top jaryp, osy kórsetkish jaǵynan HH ǵasyrdyń alpysynshy jáne jetpisinshi jyldary atoı salǵan Belgııanyń aty ańyzǵa aınalǵan veloshabandozy Eddı Merkspen teńesti.
– Mark Kavendıshti tanystyryp jatýdyń esh qajeti joq dep oılaımyn. Ol velosport tarıhyndaǵy eń úzdik sprınter ekeni esh daý týǵyzbasa kerek. Osyndaı myqty sportshynyń «Astana» klýbynyń qataryna qosylǵanyna men dán rızamyn. Kavendısh qaı jarysqa qatyssa da tek jeńiske jetýdi kózdeıdi. «Astananyń» da maqsaty sol. Sondyqtan da aldaǵy maýsymda biz jarqyn jeńisterimizben óz jankúıerlerimizdi qýantý úshin esh aıanyp qalmaımyz, – deıdi «Astana» klýbynyń bas menedjeri, Olımpıada chempıony Aleksandr Vınokýrov.
Bıyl kóktemde Mark 38 jasqa tolady. Soǵan qaramastan ol áli de babynda. Byltyrǵy maýsymda Kavendıshtiń «Mılan-Týrın» dodasynda dara shyǵyp, «Djıro d’Italııa», «Oman týry» jáne «BAÁ týry» sekildi jarystardyń kezeńdik saıystarynda jeńimpaz atanýy osy sózimizdiń aıqyn dáleli.
