Memleket basshysy Nursultan Nazarbaev Qazaqstan Prezıdenti janyndaǵy Shetel ınvestorlary keńesiniń aıasynda Eýropa Qaıta qurý jáne damý bankiniń prezıdenti Sýma Chakrabartımen kezdesti, dep habarlady Qazaqstan Prezıdentiniń baspasóz qyzmeti.
Kezdesý barysynda banktiń Qazaqstandaǵy qyzmeti, sonyń ishinde elimizdegi túrli jobalardy júzege asyrýǵa qatysý máseleleri talqylandy.
Memleket basshysy Qazaqstan men EQDB arasynda seriktestik týraly negizdemelik ýaǵdalastyq jasalǵanyn, ol bizdiń el men atalǵan qarjy uıymynyń yntymaqtastyǵyn keńeıtýge zor múmkindikter týdyratynyn atap ótti.
– Qazaqstan ekonomıkany damytýǵa 1 trıllıon 600 mıllıard teńge bóledi, osynsha somadaǵy ınvestısııalar ózge kózderden de tartylatyn bolady. Men Banktiń Qazaqstanmen jemisti jumys istegenin bilemin. Bizdiń ózara yntymaqtastyǵymyz jalǵasady dep úmittenemin, – dedi Nursultan Nazarbaev.
EQDB Ortalyq Eýropadan Ortalyq Azııaǵa deıingi 34 elde, sondaı-aq, Ońtústik jáne Shyǵys Jerorta teńizi memleketterinde jobalardy qarjylandyrady.
***
Memleket basshysy Nursultan Nazarbaev Qazaqstan Prezıdenti janyndaǵy Shetel ınvestorlary keńesi aıasynda «Toıota Motor Korporeıshn» kompanııasynyń basqarma tóraǵasy Takeshı Ýchııamadamen kezdesti.
Kezdesýde N.Nazarbaev pen T. Ýchııamada elimizde avtomobıl ónerkásibin damytý, sonyń ishinde osy «Toıota» markaly avtomobılderdi Qazaqstan aýmaǵynda óndirý máselelerin talqylady.
«Toıota Motor Korporeıshn» – avtomobıl qurastyrýshy japonııalyq iri korporasııa. Ol qarjylyq qyzmetter de usynyp, bıznestiń ózge de baǵyttarynda jumys isteıdi. Kompanııa qyzmetkerleriniń sany 320 myń adamnan asady.
***
Memleket basshysy Nursultan Nazarbaev Qazaqstan Prezıdenti janyndaǵy Shetel ınvestorlary keńesi aıasynda «Shell» konserniniń bas atqarýshy dırektory Ben van Berdenmen kezdesti.
Kezdesý barysynda eldiń munaı jáne gaz salasyn ári qaraı damytý jáne negizgi ınvestısııalyq jobalardy júzege asyrý máseleleri talqylandy.
Túrli energetıkalyq jáne munaı-hımııa kásiporyndaryn biriktiretin «Shell» halyqaralyq konserni Qazaqstannyń munaı-gaz salasyndaǵy iri ınvestor bolyp sanalady.
