Kásipkerlikke keń múmkindik

Túrli sala boıynsha  kásibin násibine aınaldyrǵan bıznesmender jumysyn jan-jaqty talqylaý maqsatynda Taldyqorǵanda   Ult­tyq kásipkerler palatasynyń basqarma  tóraǵasy Abylaı Myr­zah­metov pen  Almaty oblysy ákiminiń orynbasary Serik Turdalıevtiń qatysýymen  jıyn bolyp ótti. Onda Elbasy talabyna sáıkes, tek shıkizat óndirýmen shektelip qalmaı óndiris oryndaryn ór­ken­detý,  aýylsharýashylyq qury­lymdaryn damytý,  jalpy kásipkerlerge  qoldaý kórsetý sekildi búgingi   kúnniń ózekti máseleri ashyq aıtyldy. Utymdy oı, qundy pikir ortaǵa salynyp, saraptaldy. «Jalpy, Jetisý jerinde de kásipkerlikke keń jol ashylǵan. «Bıznestiń jol kartasy-2020» memlekettik baǵdarlamasy aıasynda  Almaty oblysyna 7,9 mlrd.  teńge bólingen edi.  Osy qarajatty ıgerý barysynda 8 myń jumys orny saqtalyp, qosymsha  1300 adam jumysqa alyndy. 3 jobany  júzege  asyrý barysynda bıýdjetten bólingen  93,8 mln.  teńge tolyǵymen ıgerilip,  3 myń kásipkerge   memlekettik  qoldaý kórsetilip  8 mlrd. teńge bólingeni taǵy bar», dedi Almaty oblystyq kásipkerler palatasynyń dırektory Lázzat Shyńǵysbaeva. Negizi agrarly oblys  bolǵan­dyqtan Jetisý jerinde aýyl sharýashylyǵy salasy óte jaqsy damyǵan. Ýaqyt talabyna saı kókónisterdi toqtaýsyz ósirýge arnalǵan jylyjaılar  jetkilikti. Osyndaı artyqshylyqtary bol­ǵandyqtan kásipkerler óndirgen ónimderiniń 80 paıyzyn eksportqa shyǵarý múmkindigine ıe bolyp otyr. Árıne bul rette kásipkerler palatasynyń zańnama sheńberinde atqaryp otyrǵan jumysyn erekshe atap ótý kerek.  Keleli jıynda Ulttyq kásipkerler  palatasy  tarapynan jer-jerde qordalanyp qalǵan problemalardy  sheshýdiń eki tásili  ortaǵa salyndy.  Birinshiden,  20 jyldan beri ózindik jemisin berip kele jatqan túrik tájirıbesi boıynsha arnaıy qor qurý, ekinshiden,  nesıelik seriktestiktiń belsendiligin arttyryp damytý kerek. Sonymen qatar Abylaı Myrzahmetov aımaq bıznesmenderine  memlekettik bılikpen qarym-qatynasty nyǵaıtyp, oblystyq ákimdikpen birlese jıyndar ótkizip otyrý jóninde keńes berdi. Qoryta aıtqanda, bul basqo­sýǵa qatysqandar ózindik oı túıip qaıtty. Nurbol ÁLDIBAEV, «Egemen Qazaqstan». Almaty oblysy.