Jaı-kúıiń qalaı, Qarashyǵanaq?

Áıgili Qarashyǵanaq kenishi or­na­lasqan óńirdiń áleýeti úlken. Mono­qalalar qataryna jatatyn Aqsaıda munaı-gaz salasyna qatysty kóptegen iri jobalar júzege asyrylý­da. Batys Qazaqstan oblysyna jumys saparymen kelgen  Munaı jáne gaz mınıstri Uzaqbaı Qarabalın osy nysandardyń birqataryn aralady. Aqsaıdyń ındýstrııalyq parkinde bolǵan kezde ol basty nazardy qazaqstandyq úleske aýdarý qajettigin qadap aıtty. «Qurastyrylatyn qajetti bólshekterdiń negizgi bóligin shetelden ákelýdi azaıtyp, oblys kásiporyndarynda jasaý máselesine kirisý kerek», dedi mınıstr. Kúni búgin quny 1,4 mlrd. teńge quraıtyn park­te 64 jańa jumys orny ashylǵan. Jumysshylar munaı-gaz salasyna qajetti uńǵymany gıdravlıkalyq bas­qarý panelderin, klapandardy, joǵary qysymdy qubyr detaldaryn, órt qaýipsizdigi dabyly júıesin, qorshaǵan ortany lastaý­dan saqtaıtyn qondyrǵylardy qurastyrýdy jetik meńgergen. Bir sózben aıtqanda, ındýstrııalyq park zamanaýı qyzmet túrlerin sheteldik jáne otandyq áriptesterine joǵary sapamen kórsetýge múddeli. Oblys ákimdiginiń jáne PSA JShS-niń qoldaýymen park KPO b.v. kompanııasynan 6 mln. AQSh dolla­rynyń eki jobasyn jeńip alypty. «Kenishti ıgerýshi alıanspen arada «Jol kartasyna» qol qoıdyq. Aldaǵy ýaqytta onyń sheńberine kiretin kóptegen sharýalardy birlesip atqaratyn bolamyz», dedi park basshylyǵy. Qarashyǵanaq kenishin ıgerýshi KPO b.v. kompanııasynyń bas dırektory Damıano Rattımen kezdesý barysynda Uzaqbaı Qarabalın kompanııanyń bas keńsesin Aqsaıdan Oralǵa kóshirý kerektigin qaperge saldy. «Bul iskerlik turǵysynan aıryqsha mańyzdy sheshim bolady. Men keshe ǵana Aqtóbede «SNPS-Aqtóbemunaıgaz» kásipornynyń jańadan salǵan ǵımaratyn aralap kórdim. О́te yńǵaıly, ári qalaǵa kórik berip tur. Sondyqtan sizderdi de osy bastamany qoldaýǵa shaqyramyn», dedi mınıstr. Kezdesý barysynda Batys Qazaqstan oblysynyń ákimi Nurlan Noǵaev KPO b.v. basshylyǵyna qurylys jumystaryn qarjylandyrý suraqtaryn sózbuıdaǵa salmaı, qysqa merzimde sheshýdi usyndy. «Oblysta qurylys maýsymy erte kóktemde bastalyp, qara kúzge deıin jalǵasady. Al sizder áleýmettik jobaǵa bólinetin qarjy máselesin sheshýdi udaıy keshiktiresizder. Nátıjesinde qurylystyń merzimi ótip ketedi de, qysta bastalady. Ol sapaǵa da keri áserin tıgizedi. Tipti, keı suraqtardy tikeleı kompanııa basshylyǵyna qońyraý shalý arqyly sheshýge týra keledi. Oblys ákimi ylǵı KPO b.v basshylyǵyna qońyraý shalyp otyrsa, munymen is bite me? Sondyqtan, bári kelisilgen merzimde, zań sheńberinde atqarylýy kerek»,  dedi Nurlan Asqaruly. Batys Qazaqstan munaı-gazǵa baı bola tura áli kúnge deıin syrttan ákelinetin benzın men dızel otynyna táýeldi ekendigi belgili. Osy máseleni taıaý arada otandyq «Kondensat» AQ sheshemiz dep otyr. Jańa joba týraly mınıstrge aksıonerlik qoǵam basshysy Valerıı Júnisov baıandap berdi. Toqtar ǴABDIREShULY, jýrnalıst, Temir QUSAIYN, «Egemen Qazaqstan». Batys Qazaqstan oblysy, Bórli aýdany.