Kaırde ótken «Ai forum» jastar forýmynda biregeı joba tanystyryldy. Álemniń 26 elinen kelgen ondaǵan komanda ónerkásiptik revolıýsııa, jasandy ıntellekt, blokcheın, óner jáne ekologııa salasyndaǵy jobalarymen bólisti.
Forým 4 kúnge sozyldy. Ártúrli taqyryp boıynsha dárister men semınarlar ótip, oqýshylar ózara pikir almasty.
«Men jasandy ıntellekt seksııasynda jobamdy usyndym. Bizdiń joba qazylar alqasy men kórermenderdiń jaqsy baǵasyn aldy. Osy ónertabyspen byltyrdan beri aınalysyp kelemiz. Sondaı-aq osy forýmda biz úshin tanymdyq ekskýrsııa uıymdastyryldy. Bul shyǵarmashylyq bastamany damytýǵa kómektesetini sózsiz», deıdi joba avtorlarynyń biri, 12-synyp oqýshysy Vıktor Kahno.
Vıktor Kahno, Maksım Sýrın, Mırhaıat Denı noý-haýy ekinshi jyl qatarynan Enactus World Cup stýdenttik kásipkerliktiń fınalısi atandy. О́tken jyly balalarǵa NARXOZ ýnıversıtetiniń memlekettik grantynyń sertıfıkattary tabys etilgen edi.
Aıta keteıik, nashar kóretin jáne zaǵıp jandarǵa arnalǵan kózildirik kameranyń kómegimen, arnaıy sensormen jumys isteıdi. Bul kameranyń iske qosylýy úshin oqýshylar arnaıy baǵdarlama kodyn jazǵan. Osylaısha, ınfraqyzyl tolqyndardyń kómegimen tehnologııa obektilerge, kóliktiń kez kelgen túrine, baǵdarshamdarǵa, jol belgilerine, velosıpedshiler men adamdarǵa deıingi qashyqtyqty anyqtaı alady.
Jas ónertapqyshtar avtonomdy kózildirikterdiń kómegimen qala boıynsha óz betinshe qaýipsiz qozǵalýǵa bolatynyn aıtady. Bul ádis zaǵıp jandardyń kúndelikti ómirin aıtarlyqtaı jeńildetedi degen qorytyndyǵa kelip otyr.
Jetisý oblysy
