Ybyraı atamyzdyń óz jurtymyzda da bolsa degen ıgilikterdiń qyzyǵyn búginde barynsha kórip otyrmyz. «Tastan saraı salý, aıshylyq alys jerlerden jyldam habar alý» degen túk te qıyndyq týdyrmaıtyn boldy. «Aty joq qur arbany myń shaqyrym jerlerge kún jarymdy barǵyzý» bylaı tursyn, aspanda qustaı ushyp, álemniń bir túkpirinen ekinshi túkpirine birer saǵatta jetip baratyn boldyq. Muny az deseńiz, «otynsyz tamaq pisirý, shalqyǵan teńizderde balyqtaı júzý» jáne basqa da buryn adamnyń óńi túgil túsine de kirmegen dúnıelerdi ózimiz meńgerip aldyq. Árıne, qýanarlyq jaıt. Biraq biz Ybyraı atamyzdyń jurtyna tilep, atap kórsetken jaqsylyqtarǵa qol jetkizdik te, osymyzǵa toqmeıilsip, alǵa qaraı jyljymaı qalǵandaımyz. Dáliregin aıtqanda, ýaqyt talabyna saı ilgerileýdiń tyń joldaryna túsýge talpynysymyz álsiz.
Qazirgi tańda úı salý, jyldam habar alý, aty joq arbany júrgizý, aspanda ushý, otynsyz tamaq pisirý, teńizde balyqtaı júzý damýdyń ólshemi bolmaı qalǵany barshaǵa málim.
Búginde shıkizatty tereńdep óńdep, ony daıyn buıymǵa aınaldyryp, uqsatyp satý, óz ónerkásibińdi órkendetip, basqasyn aıtpaǵanda qarapaıym qajetti zattar, kıim-keshek shyǵarý, aýyl sharýashylyǵyńnyń ıgiligin arttyra otyryp ózińdi azyq-túlikpen qamtamasyz etý, kreatıvti ındýstrııany damytý máselesinde kenjelep qalsań, «О́ner-bilim bar jurttar» qataryna ilese almaısyń. Osy jaıt dál qazir bizdiń basymyzda bar. Halyqqa asa qajetti azyq-túlikten bastap basqa da kerek-jaraqty syrttan tasý, ózgeden qyp-qyzyl aqshaǵa satyp alý el ekonomıkasyn, áleýmettiń turmys-tirshiligin basqaǵa táýeldi etýdi tereńdete túsetini sózsiz.
Osyndaıda Ybyraı Altynsarınnyń:
«...Biz de beker jatpalyq,
Osylarǵa tanyspaı;
At óneri bilinbes
Báıgege túsip jaryspaı;
Jelkildep shyqqan kók shópteı
Jańa óspirim dostarym,
Qataryń ketti-aý alysqa-aı,
Umtylyńyz, qalyspaı...» dep sonaý zamanda jurtyna qarata shyryldap aıtqan sózi sanańda jańǵyryp, júregińdi shymyrlatady. Y.Altynsarın atalǵan ósıetin dál qazirgi Qazaqstan halqyna, onyń atqarýshy bıligine aıtyp turǵandaı áser qaldyrady.
Biz joǵaryda kreatıvti ındýstrııa jóninde aıttyq. Osy kreatıvti ındýstrııany shyndap qolǵa alyp, onyń ıgiligin kórip otyrǵan elderdi búgingi naǵyz «О́ner-bilim bar jurttar» dep tanýǵa bolady. Bizdiń úlken mejemizdiń biri osyndaı jurttardyń qataryna qosylý bolýy kerek.
Bizge zaman talaptaryna laıyqty jaýap bere otyryp damý, ozyq tehnologııalardyń paıda bolýynan týyndap jatqan ózgeristerdiń tabanynda janshylyp qalmaı, shylaýynda ketpeı, qaıta sol ekpindi ózgeristerdi tıimdi paıdalaný el Táýelsizdiginiń, bolashaǵymyzdyń kepili ekenin uǵatyn kez jetti.
Bul jerde kóp túıtkilderdiń biri retinde bilim berý isin qaıta jańǵyrtý qajettigin aıtqymyz keledi. Ásirese qýlyǵyn, keselin ishine jasyrǵan, jaltyraq jarnamalardyń artynda jasyrynǵan, kóke-jákelerdiń kómegine súıenip kúneltip júrgen JOO-larǵa erekshe nazar aýdara otyryp, barlyq joǵary oqý oryndaryn qatań talaptar negizinde suryptap, olardy arman qýyp, oqý izdep barǵan jastyń kóńilinen shyǵatyndaı, ýaqyt talabyna jaýap beretindeı deńgeıge jetkizý qajet. JOO-lardaǵy bıýrokratızm, paraqorlyq, basqa da jaǵymsyz kórinister erneýinen asyp, kilkip turǵanda elimizdi «О́ner-bilim bar jurttar» qataryna qosady dep úmittendirer jastarymyz kóp shyǵa qoımaıdy.
