Turǵyn úıden órt shyqty

«Qosqabatty úıde kólemi 5 lıtrlik gaz ballony jaryldy, órt shyqqan joq. Ekinshi qabattaǵy №6 páterdiń aǵash edeni men qabyrǵalary tolyqtaı, al ekinshi qabattaǵy 4, 5-páterler, birinshi qabattaǵy 3-páter jartylaı qıraǵan. Aldyn ala boljam boıynsha onyń aýdany 36 sharshy metrdi quraıdy», dep habarlady Qaraǵandy ob­lysynyń tótenshe jaǵdaılar de­par­tamenti.

Tıisti quzyrly uıymdar oqıǵa ornynda tergep, tekserý amaldaryn júr­gizýde. Tekserý aıaqtalǵansha jylý jáne ishinara elektr júıesi óshirildi. Turǵyndar ýaqytsha jataqhanaǵa ornalastyryldy. Qaraǵandy qalasynyń ákimi Meıram Kojýhov turǵyndarmen kezdesip, jaǵdaıdy baıandady.

– Qazir úı jylý júıesinen aǵy­tyldy. Sebebi birinshi kireberiste ede­n­deri, qabyrǵalary qulaǵan. Úıdiń ekinshi jartysyna, ıaǵnı ekinshi kireberiste jylý berýge tyrysamyz. Ondaǵy 7-12 páterlerge qaýipti kórip turǵan joqpyz. Al birinshi kireberis týraly qorytyndy ázirge shyǵara almaımyz, sarapshylar jumys isteýge tıis, – dedi Qaraǵandy qalasy ákimi Meıram Kojýhov.

Úı túnde qulyptap jabyldy. Tur­ǵyndar baǵaly zattaryn qut­qa­rý­shylar kómegimen alyp shyqty.

Zardap shekkenniń bireýi – 1970 jyly týǵan er adam, ekinshisi – 1971 jyly týǵan áıel adam. Ekeýin de kúıik shalǵan. Qaraǵandy qalasyndaǵy ob­lys­tyq medısına ortalyǵyna jet­kizildi. Densaýlyq saqtaý bas­qarmasy baspasóz qyzmetiniń habarlaýynsha, naýqastardyń hali – ortasha aýyr jaǵdaıda. «Er adamnyń basy jáne oń jaq ıyǵy kúıgen. Kombýstıologııa bó­limine jatqyzyldy. Jaǵdaıy – or­tasha aýyr. Áıel adamnyń oń jaq bilegi, oń jaq ıyǵy, oń jaq sany kúıgen. Ol da kombýstologııa bó­li­min­de jatyr», delingen basqar­ma­nyń má­limdemesinde.

Qaraǵandy