Qoǵam • 25 Qańtar, 2023

Qazaqstandyqtardyń zeınetaqy jınaǵy ósti

2023 jylǵy 1 qańtardaǵy jaǵdaı boıynsha qazaqstandyqtardyń zeınetaqy jınaqtary 14,7 trln teńgeni qurady, dep habarlaıdy Egemen.kz.

Marjan TILEÝBEK

BJZQ málimetinshe, 2022 jyly bul kórsetkish 1,6 trln teńgege ósti. 2021 jyly zeınetaqy jınaqtarynyń ósimi tek 1% qurady. Bul jınaqtaýshy zeınetaqy júıesiniń damý qarqyny, zeınetaqy jınaqtarynyń ósýi jyl saıyn 15%-dan 20%-ǵa deıin bolǵan kezde zeınetaqy jınaqtarynyń balamaly maqsattarǵa aıtarlyqtaı alynýyna deıingi kezeńderdiń kórsetkishterine josparly túrde qaıtarylatynyn bildiredi.

Mindetti zeınetaqy jarnalary (MZJ) esebinen qalyptastyrylǵan zeınetaqy jınaqtary 2023 jylǵy 1 qańtarǵa 14,2 trln teńgege jetip, bir jylda 11,9% ulǵaıdy.

Mindetti kásiptik zeınetaqy jarnalary (MKZJ) boıynsha zeınetaqy jınaqtarynyń somasy 12 aıda 23,4% ulǵaıyp, shamamen 445,4 mlrd teńge boldy.

Eń úlken ósimdi, ıaǵnı 107% astam kórsetkishti erikti zeınetaqy jarnalary (EZJ) boıynsha jınaqtar berdi. Olar 2022 jyldyń qorytyndysy boıynsha shamamen 3,6 mlrd teńgeni qurady.

Jınaqtardyń jalpy ósimi zeınetaqy jarnalary men ınvestısııalyq tabys túrindegi kiris aǵyndary esebinen qamtamasyz etildi. Bul rette salymshylardyń shottaryna jarnalar túrinde bir jyl ishinde 1,7 trln teńgeden astam qarajat tústi. Bul 2021 jylmen salystyrǵanda 29 %-ǵa kóp. MZJ esepke alynatyn jeke zeınetaqy shottaryna (JZSh) bir jyl ishinde 1,65 trln teńge tústi, MKZJ – 77 mlrd teńge (39%-ǵa ósti), EZJ jarnalary bir jyl ishinde 2,3 mlrd teńgeni qurady (ósim 190%).

2022 jyly ınvestısııalyq kiris 914 mlrd teńgeden asty. Iаǵnı, ótken jyldyń qorytyndysy boıynsha aktıvterdiń kiristiligi oń sıpatqa ıe.

BJZQ-dan tólemder túrindegi shyǵys aǵyndary jyl basynan beri shamamen 1,2 trln teńgeni qurady. Onyń basym bóligi turǵyn úı jaǵdaılaryn jaqsartýǵa jáne emdelýge arnalǵan birjolǵy zeınetaqy tólemderi (BJT) – 918 mlrd teńge. Bul rette balamaly maqsattarǵa tólemder kólemi 2021 jylmen salystyrǵanda 65%-ǵa tómendedi.

«Jas boıynsha tólemder 20% ulǵaıyp, shamamen 122 mlrd teńge boldy. Aıta ketý kerek, BJZQ-dan keste boıynsha ortasha aılyq tólem somasy (zeınet jasyna tolýǵa baılanysty) 29 973 teńgeni, al aı saıynǵy tólemniń eń joǵary somasy 707 326 teńgeni qurady», delingen habarlamada.

Sondaı-aq muragerlik boıynsha tólemder – 60,2 mlrd teńge, el sheginen tys turaqty turýǵa ketýge baılanysty tólemder – 48,3 mlrd teńge, múgedektik boıynsha tólemder – 2,5 mlrd teńge, jerleýge tólemder – 5,3 mlrd teńge. Saqtandyrý uıymdaryna shamamen 26 mlrd teńge aýdaryldy.

2023 jylǵy 1 qańtardaǵy jaǵdaı boıynsha BJZQ-daǵy jeke zeınetaqy shottarynyń sany 12,1 mln birlikke jetti. Mindetti zeınetaqy jarnalary boıynsha – shamamen 11 mln birlik. 2023 jylǵy 1 qańtardaǵy jaǵdaı boıynsha MKZJ boıynsha shottar sany – 595 710 birlikti qurady. EZJ esebi boıynsha 358 695 JZSh ashyldy.