«Biz buǵan deıin otandyq medıa ındýstrııany damytý, iskerlik qatynastardy kóbeıtý maqsatynda Astana Media Week halyqaralyq medıa aptalyǵyn uıymdastyrdyq. Sondaı-aq aımaqtaǵy ózekti máselelerdi ortaǵa salyp, ortaq aqparattyq keńistik qurý máselelesi kóterilgen «Ortalyq Azııa» medıaforýmyn da ótkizgenbiz. Oǵan ózge memleketterden eks-prezıdentter, eks-premerler, álemdik medıa salasynyń belgili mamandary, Pýlıtser syılyǵynyń ıegerleri bastaǵan 300-den astam delegasııa qatysqan. Sonymen qatar taıaýda ótken alqa májilisinde aqparat jáne BAQ máselesin kóterdik. Endi, mine, merzimdi basylymdardyń hal ahýalyn ańdap, jaǵdaıyn taldap, baǵyt-baǵdaryn saralaýdyń kezegi kelip otyr. Memleket basshysy Qasym-Jomart Toqaev «Jýrnalıster óz eline jáne azamattaryna shynaıylyq janashyr bolýy tıis. Buqaralyq aqparat quraldary beker tórtinshi bılik atanbasa kerek. Sol sebepti sizder jurttyń sanasy men sezimine yqpal etý máselesine muqııat qaraǵandaryńyz jón» dep atap ótkeni belgili. Merzimdi basylymdar, onyń ishinde óńirlik BAQ jýrnalıstıkanyń alǵashqy mektebi, alǵy shebi ispetti. Aýdan, aımaqtarymyzdyń ardaqty azamattary, zııalylar qaýymy toptasatyn ónegeli orta. Qazaqtyń kóptegen kórnekti tulǵalary tyrnaqaldy týyndylaryn sonda jarııalap, elge tanyldy. О́tken jyly óńirlerge saparlar kezinde kóptegen basylymdardyń redaksııasyna arnaıy baryp, jaı-kúıimen jaqyn tanysqan edik. Sol kezeńde óńirlerdegi ózekti máselelerdi Astanada oılasamyz dep ýáde bergenbiz. Sonyń oraıy búgin kelip otyr», dedi mınıstr.
Sondaı-aq ol búgingi basqosý óńirlerdegi basylymdardyń túıindi máselelerin talqyǵa salyp, bolashaqty baǵamdaýǵa paıdaly bolatynyna senim bildirdi. Budan bólek óńirdegi basylymdardy damytý maqsatynda atqarylyp jatqan jáne istelýi kerek jumystar týraly oıyn ortaǵa saldy.
«Biz jýrnalısterdiń quqyqtyq mártebesin kóterip, áleýmettik jaǵdaıyn jaqsartý maqsatynda «Mass-medıa týraly» zań qabyldaýdy kózdep otyrmyz. Jańa zań jurtshylyqtyń talqylaýyna shyǵaryldy. Qazir ol keńinen talqylanyp jatyr. Sonymen qatar Aqparatqa qol jetkizý máseleleri jónindegi zańǵa da túzetýler ázirlenedi. Aqparattyq doktrına talqylaýdan ótti. Sondaı-aq aqparat salasyn damytýdyń 2023-2030 jyldarǵa arnalǵan tujyrymdamasyn daıyndaýǵa kiristik. Aımaqtaǵy basylymdardy qarjylandyrý tetigi men erejelerin qaıta qarastyryp jatyrmyz. BAQ-qa beriletin memlekettik tapsyrystyń talaptaryn jeńildetýge múddelimiz», dedi vedomstvo basshysy.
Onyń aıtýynsha, Qazaqstandyq Qoǵamdyq damý ınstıtýty bazasynda jýrnalısterdiń biliktiligin arttyrý jáne salalyq jýrnalıstıkany arttyrý maqsatynda túrli sheberlik synyptary ótkiziledi. О́ńirlerge saparlar jáne osy forýmǵa daıyndyq kezinde aımaqtardaǵy keıbir basylymdardyń tipti saıty da joq ekeni anyqtaldy.
«Keıbir óńirlik basylymdar respýblıkalyq deńgeıde tarap otyrǵanyn, saıttarynyń jaqsy jumys isteıtinin kórdik. О́ńirlik basylymdardyń saıttaryn jasaý jáne qoldaý, áleýmettik jelilerdi tıimdi paıdalaný boıynsha ádistemelik kómek kórsetildi. Saıttary joq keıbir aýdandyq gazetterdiń saıttaryn jasap berýge biz qoldaý kórsetemiz. Postshyndyq kezeńinde shyndyǵymyzdy joǵaltyp almas úshin barshaǵa ortaq erejeler men zań talaptaryn basshylyqqa alǵanymyz jón. Osy oraıda onlaın platformalar men ınternet jarnamanyń qyzmetin retteıtin jańa zań jobasy ázirlenip jatyr. Bul zań jobasy sheńberinde qoldanýshylardyń jaýapkershiligi kúsheıedi. Osy rette basylymdar jarnama berýshilermen júıeli jumys istegeni abzal. Ásirese qazaq basylymdary jarnamamen júıeli jumys istemeıtindigin aıta ketken jón», dep atap ótti Darhan Qydyráli.
Vedomstvo basshysynyń aıtýynsha, mınıstrlik «Qazpochta» AQ-men birlesip, aqyly jetkizý, jazylýǵa ońtaıly jaǵdaı jasaý jaıly memorandýmǵa qol qoıdy.
«Aqparattyq qaýipsizdik máselesi de nazardan tys qalmaý kerek. О́ńirlik BAQ-ty qoldaý úshin olarda jaryq kórgen mazmundy maqalalardy respýblıkalyq basylymdarda jarııalaý tájirıbesin jalǵastyrǵan jón degen oıdamyz. Shalǵaı aımaqtardaǵy basylymdarda shyndalyp shyqqan jas jýrnalısterdi úlken basylymdarǵa jumysqa tartý máselesin de nazarda ustaý kerek. Býyn almasýy, dástúr sabaqtastyǵy sátimen jalǵasý tıis», dep qorytyndylady Darhan Qydyráli.
Aıta keteıik, is-sharaǵa 70-ten astam spıker qatysyp, sóz sóıleıdi. Taǵylymdy kezdesýge ár óńirden 200 delegat kelgen. Olardyń qatarynda óńirlik basylym basshylary, bas redaktorlar, jýrnalıster jáne redaksııa qyzmetkerleri bar.
