Saıası alańdaǵy ustanym

Sezge óńirlerden kelgen delegattar, «Menin Elim Dala», «Artsport» qoǵamdyq birlestikteriniń ókilderi, áıelderdiń zeınet jasyn tómendetý qozǵalysy men kásipodaq uıymdarynyń jáne Zań keńesi palatasynyń músheleri qatysty.

Quryltaıda sóılegen sózinde partııa tóraǵasy Ermuhamet Ertisbaev elimizdegi qazirgi ahýalǵa qysqasha taldaý jasady. Ol qańtar oqıǵasy men olıgarhattyń «jyrtqysh» saıasatyna qaramastan, qoǵamda áleýmettik ádilettilik ıdeıasy ózektiligin joǵaltpaǵanyn atap ótti.

– Júıeni sherýge shyǵý, narazylyq bildirý arqyly ózgertýge bolady. Alaıda muny Parlamentte júzege asyrǵan tıimdi. Sondyqtan biz qazaqstandyqtardy alańǵa emes, saılaý ýchaskelerine shaqyramyz. Sebebi azamattar bılikke qoıatyn talabyn órkenıetti, demokratııalyq jolmen oryndatýǵa qol jetkizýge tıis. Qazaqstan Halyq partııasynyń Memleket basshysy Qasym-Jomart Toqaevtyń Qazaqstanda áleýmettik memleket qurýǵa jáne olıgarhııalyq kapıtalızmge qarsy kúreske baǵyttalǵan reformalaryn qoldaıdy. Halyq bıligin ornatý úshin naqty ókilettikterdi halyq qalaýlylaryna – Májilis pen máslıhat depýtattaryna berý qajet. Sonda Qazaqstan halqy memlekettik apparattyń ókildi bılik organdaryna esep berýine, sot jáne quqyq qorǵaý organdaryn sybaılas jemqorlyqtan tazartýǵa jáne barlyq deńgeıdegi ákimderdi saılaýǵa qol jetkizedi. Áleýmettik reformalardy júzege asyrý úshin qomaqty qarjy kerek. Bul – sheshýge bolatyn másele. Elge engizilip jatqan ınnovasııalardy qarjylaı súıemeldeýdi qamtamasyz etýge múmkindik beretin aldyn ala oılastyrylǵan aýqymdy ekonomıkalyq baǵdarlama qajet, – dedi Ermuhamet Ertisbaev.

Sezde partııanyń alǵa qoıǵan maqsattary men jospary aıtyldy. Partııa músheleriniń aıtýynsha, áleýmettik saıasatta árbir qazaqstandyqqa qamqorlyq jasaý jáne olardyń ómir súrý deńgeıin arttyrý basym baǵyt bolyp belgilenýi kerek. Maqsatqa jetý úshin kedeılikpen kúres jarııalanyp, eńbek zańnamasy men zeınetaqy júıesin jetildirgen jón. Buǵan qosa qoljetimdi medısına men tegin bilim berýdi jáne árbir azamattyń memlekettik tildi meńgerýine jaǵdaı jasaýǵa erekshe nazar aýdarý qajet. «Bizde adamdardyń áleýmettik qorǵalmaǵan sanaty bolmaýy kerek. Azamattar memleketke salyq tóleıdi, ıaǵnı olarda ózderin zańnamalyq, quqyqtyq, áskerı, áleýmettik jaǵynan qorǵaýdy talap etý quqyǵy bar», dedi partııa tóraǵasy.

Jıynda Májilis depýtattyǵyna kandıdattardyń partııalyq tizimi bekitildi. E.Ertisbaev Parlament Májilisine saıası uıymnyń eń úzdik, eń laıyqty músheleri kandıdat retinde iriktelip alynǵanyn aıtty. «Qatarymyzda ártúrli ulttar men áleýmettik toptardyń ókilderi bar. Qoǵamda pikir alýandyǵy neǵurlym kóp bolsa, soǵurlym demokratııanyń bási bıik bolady. Ulttyń bolashaǵy men jurttyń keleshegi laıyqtylarǵa ǵana senip tapsyrylýǵa tıis», dedi E.Ertisbaev.

Sezde depýtattyqqa kandıdattar, óńirlerdegi fılıal basshylary, QHP Ortalyq apparatynyń ókilderi sóz sóılep, oılaryn ortaǵa saldy. Máselen, QHP Almaty oblystyq fılıalynyń tóraǵasy T.Júndibaev aldaǵy Májilis pen máslıhattardyń saılaýy – elimizdiń saıası júıesin reformalaýdyń alǵysharty ekenin tilge tıek etip: «Ádilettilikti ańsamaıtyn adam, qoldamaıtyn qoǵam joq. Onyń qatarynda 1,5 mln turǵynnyń mekeni – Almaty oblysy da bar. Qasıetti óńirde taıaq tastam jer tapshy. Qara jerdiń bári – olıgarhtardyń qolynda. Bul másele – aýyl sharýashylyǵy qarqyndy damyp kele jatqan aımaqtyń jolyn bógep otyr», dedi. Onyń aıtýynsha, eń úlken túıtkildiń biri – qandastardyń jaı-kúıi. Sebebi «Otanym» dep oralǵan azamattar arasynda tájirıbeli mamandar jeterlik. О́kinishtisi dıplomdaryn nos­trıfıkasııalaý múmkin bolmaı otyr. «Shyny kerek, klandyq-olıgarhııalyq kapıtalızm dáýirine núkte qoıylatyn kún týdy. Sebebi «Baılar balpań basyp, kedeıler jaltańdasyp» ǵumyr keship otyr. Jumyssyzdyq, kúısizdik talaıdyń júıkesin juqartty. Halyqty nesıe tuqyrtyp barady», dedi T.Júndibaev.

О́z kezeginde QHP Qaraǵandy oblys­tyq fılıalynyń tóraǵasy Halel Maqsutov otandastarymyzdyń qaýipsiz­digi men elimizdiń áleýmettik-ekonomı­kalyq damýy erekshe nazarda bolýǵa tıis ekenin alǵa tartty.

– Qaraǵandy – topyraǵy kenge toly qasıetti óńir. Ondaǵy óndiris oshaqtarynda myńdaǵan adam eńbek etedi. Qarapaıym jumysshylardyń turmys-tirshiligi, kókeıinde qordalanǵan máseleler Halyq partııasyn alańdatyp otyr. Qarasha halyq ta, Halyq partııa­sy da túbegeıli ózgeristi talap etedi. Demek osynaý syn saǵatta birigý kerek. Endigi kezekte, abyroıymyzdyń asýy da, berekemizdiń tasýy da aldaǵy saılaýǵa baılanysty, – dedi ol.

Sezde partııanyń aımaqtardaǵy fılıaldarynyń tóraǵalaryna óńirlerde elektoraldy naýqandy uıymdastyrý men ótkizýge, senim bildirgen adamdar men baqylaýshylardyń tizimin jasaýǵa jáne basqa da máselelerge qatysty naqty tapsyrma berildi.

– Qazaqstan Halyq partııasy, saıası partııalardyń ishinde saılaý aldyndaǵy sezdi birinshi bolyp ótkizip otyrmyz. Birinshi bolýdyń jaýapkershiligi – úlken, júgi – aýyr. Al birinshi bolý – bizdiń saıa­sı alańdaǵy ustanymymyzǵa aınaldy. Barshańyzǵa belgili, byltyr Halyq partııasy Memleket basshysynyń Prezıdent jáne Parlament saılaýy týraly bastamasyn birinshi bolyp qoldady. Saılaýda Qasym-Jomart Toqaevtyń kandıdatýrasyn qoldaýǵa halyq koalısııasyn qurýdy da birinshi bolyp usyndy. Biz Májilis jáne máslıhattar saılaýyna kandıdattardy da birinshi bolyp usynyp otyrmyz. Sondyqtan biz saılaýda da basym túsip, birinshi bolatynymyzǵa senemiz.

Babalarymyzdyń «Birlik bolsa – tirlik bolady» degen amanat ósıeti bar. Árıne, barshamyzǵa birlik kerek. Degenmen demokratııa jaǵdaıynda Parlament saılaýynda plıýralızm, ıaǵnı pikir alýandyǵy qajet. Ár partııa ózi úshin kúresedi. Kúres degenimiz – dıalektıkanyń birinshi zańy. Tek saıası kúrespen ǵana birlikke qol jetkize alamyz. Barlyq saılaýshyny ádiletsizdik pen zańsyzdyqqa tóze bergisi kelmese, saılaýǵa qatysyp, óz tańdaýyn jasaýǵa shaqyramyn. Bul – sizge berilip turǵan múmkindik. Eń bastysy saılaý kabınasyna kirgen sátte siz halyqtyń ajyramas bir bólshegi ekenińizdi eske alyńyz. Ár kandıdatqa aıtarym – biz tabandy kúres jolyna túsemiz, biz halyq múddesin jaqtaımyz, – dep quryltaıdy túıindedi E.Ertisbaev.