Chempıondar aýyldan shyǵady

Túrkistan oblysynyń Maqtaaral aýdanyndaǵy Eńbekshi aýyldyq okrýginde týyp-ósken Eldos Úsenuly túske deıin mektepte bolsa, kún batqansha ata-anasyna kómektesip úı sharýasymen aınalysady. Odan keıin aýdan ortalyǵyna jattyǵýǵa barady. Aldymen ol erkin kúrestiń álippesin meńgerdi. Alǵashqy bapkeri Bahtıer Ermanovtyń: «Kúnige sportzalǵa kelip, bireýdi jyǵýdy ǵana úırenbeı, jan-jaqty bolyńdar, ádebı kitaptar oqyńdar, mektepte tártipti bolyńdar, sheshen sóıleı bilińder. Qazirgi tehnologııany úırenińder. Erteń ataqty sportshy bolyp, túrli memleketterge jarysqa barsańdar qajet bolady», degen sózderin umytqan emes.

Sporttaǵy alǵashqy eki jylyn E.Zul­pan fızıkalyq daıyndyǵyna, kúres ádis­terin meńgerýge arnady. Alǵash ret erkin kúresten oblystyq chempıonatta baq synap, ekinshi oryndy ıelendi. Osy alǵashqy jetistiginen keıin aýdan ortalyǵy Myr­zakentte jańadan ashylǵan pankratıon jáne grepplıng sportyna aýys­ty. Bul sporttyń jekpe-jek túrlerinen Nurjan Qarabaev jattyqtyryp keledi. Shákirtiniń jekpe-jekke degen talabyn, boıyndaǵy qabiletin baıqaǵan bap­keri oblystyq, respýblıkalyq, halyq­aralyq dodalarǵa jıi qosyp júr. Nátı­jesinde, Eldos Úsenuly 85 kılo salmaq dárejesinde pankratıonnan jáne grepplıngten 2003-2004 jáne 2005-2006 jyl­dary týǵan sportshylar arasynda oblystyq chempıonattarda, týrnırlerde 12 ret top jaryp úlgerdi. Byltyr sáýirde pankratıonnan ótkizilgen Qazaqstan chempıonatynda 4 qarsylasyn túrli ádispen jeńip, el chempıony atandy. Al tamyz aıynda Astanada ótken grepplıngten Azııa chempıonatynda elimizdiń Kók baıraǵyn kóterip, chempıon atandy.

Osyndaı jetistikterge jetkizgen bap­­kerlerine rızashylyǵyn bildirgen Eldos erejesiz jekpe-jekten elimizdiń aby­roıy­n asqaqtatqan D.Dúngenbaev, A.Nazarov, E.Estanov, Sh.Rahmonov, Q.Ah­metov, A.Áshimov syndy aǵalarynyń je­ńisti joldaryn jalǵastyryp, qazaqtyń jaýynger halyq ekenin dáleldeı túskisi keletinin aıtady. «Elimizde erejesiz jek­pe-jek óneri jyldan-jylǵa qanat jaıyp damyp keledi. Jalpy, sportta meıli ol jańa bastaǵan áýesqoı nemese kásipqoı sportshy bolsyn óziniń ár kezdesýine óte joǵary deńgeıde daıyndyq jasaýy kerektigi málim. Mynany jeńemin dep órkókirektenip shyqsań, erteńgi kúni uty­lyp qalýyń múmkin. Qarsylasty syılaý kerek. Onyń ózin ǵana emes, eliniń tarıhyn da zerttep bilý arqyly ár kezdesý saıy­n dúnıetanymyńdy da keńeıtip otyrý qa­jet», deıdi 16 jastaǵy sportshy E.Zulpan.

Aıta ketelik, jas sportshy 2022 jyl qorytyndysy boıynsha «Aýdannyń eń úzdik sportshysy» atanǵan bolatyn.

Túrkistan oblysy