Tekeliniń tátti taǵamdary

As – adamnyń arqaýy. Unnan jasalatyn as-dámdi qarapaıym halyq kúnige qoldanady. Jumysbasty qyz-kelinshekter úshin tátti taǵamdardy dúkennen satyp ala salǵan áldeqaıda tıimdi. Sondyqtan jetisýlyq áıelder aldymen tekeli ónimderine kezekke turady. Onyń ishinde jıi suranysqa ıe – shokolad jaǵylǵan «Ýmka» pirándigi. Onyń dámdi bolyp daıyndalýynyń syry tek «Badelhan» JK-nyń tájirıbeli sheberlerine ǵana aıan. 10 jyldan beri osy ıgilikti ispen aınalysyp kele jatqan aspazdar qyr-syryn bizge baıandap berdi.

Jetisý oblysy ákiminiń baspasóz qyz­metiniń málimetine súıensek, osydan 20 jyl buryn shaǵyn seh retinde ashylǵan kásiporyn birte-birte irgesin keńeıtip, búginde aıtýly óndiris ornyna aınalǵan. Eki myńynshy jyldardyń basynda dos­tarymen ózara keńesip, osy keleli isti kásipke aınaldyrýǵa nıettengen Talǵat Tóńkerisuly alǵashqy qıyndyqtardy eske aldy. Áýelde mundaı úlken kásiporynǵa aınaldyrý oıynda da bolmaǵan.

«Eshqandaı ǵımaratymyz, arnaıy qural-jabdyqtarymyz bolǵan joq. Tek shaǵyn bir oryn taýyp ornyqtyq. Biraq birte-birte tátti pisirýge bar yntamyzben kiristik. Tekeliniń atyn shyǵaratyn sapaly ónim jasasaq dep talpyndyq. Tynymsyz eńbektenýdiń nátıjesinde armanymyz oryndaldy. 2010 jyldan beri ónimimizdi «Alaqaı» brendimen shyǵaryp kelemiz. Bizdiń pirándikterimiz Tekeli, Taldyqorǵan qalalary men oblys aýmaǵynda ǵana emes, Astana, Almaty, Qaraǵandy qalalarynda da ótimdi. On jyldan asa ýaqyt osy óńirlerge óni­mi­mizdi jetkizip otyrmyz», dedi T.Tóńkerisuly.

Máselen, kásiporynda burynnan kele jatqan óndiris sheberleri bar. Solardyń biri – Lıýdmıla Stebeneva. Onyń munda eńbek etip júrgenine on jylǵa jýyqtaǵan. Kásibı maman pirándik pisirý óndiristik jolǵa qoıylǵanyn, mundaǵy úderister 30 paıyz avtomattandyrylǵanyn aıtty. Aıtalyq, qamyrdy bólikterge bólip, pirándikti domalaq formaǵa keltirý isin arnaıy qurylǵylar atqarady. Tek sopaqsha, jumyrlaý kelgen «Qazaqstan» pirándikteri ǵana qoldan daıyndalyp pisiriledi.

Kásiporyn dırektorynyń aıtýynsha, 2018 jyly jeke qarajatyna arnaıy jabdyqtar satyp alǵan. Kompıýterlik baǵdarlamanyń kómegimen onda 12 mınýt saıyn 70 kg qamyr qajetti formalarda bólikterge bólinip, pisirýge jiberiledi. Qoldanystaǵy qurylǵynyń kómegimen pirándiktiń jańa túrlerin de jasaýǵa bolady. Tipti óndiristi avtomattandyrý aýqymyn ulǵaıtýǵa nıetti.

«Ol úshin bizge myqty, tájirıbeli tehnolog kerek. Eń bastysy óndiris úderisin avtomattandyrý deńgeıin ulǵaıtý barysynda qyzmetkerler sany qysqarmaıdy. Bilikti mamandardyń kópshiligi ondaǵan jyl bizben birge jumys istep keledi. Sondyqtan olardy kásiporynnyń ishinde basqa jumysqa aýystyryp, jumys oryndaryn saqtap qalamyz. Avtomattandyrý isin bıyl bastaımyz dep otyrmyz», deıdi T.Tóńkerisuly.

Jalpy, óndiriste 58 adam eńbek etedi. Olardyń jalaqylarynyń kólemi – 90 myń men 120 myń teńgeniń aralyǵynda. Tipti indet órship turǵan kezde de kásiporyn toqtaǵan joq. Qyzmetkerleriniń qaýip­siz­digi úshin kásiporyn basshylyǵy olardy fabrıkanyń kóligimen tasymaldaýdy uıymdastyrǵan.

Tekeli kondıterlik fabrıkasynda bir táýlikte 1-den 1,5 tonnaǵa deıin pirán­dik shyǵarady. Jalpy, ónim kólemi tap­syrysqa baılanysty aıqyndalady. Qajettiligine qaraı syılyq sývenıri retindegi ártúrli pirándik te pisiriledi. Búginde fabrıkada tátti pirándiktiń qoıytylǵan sútti, shokoladty, bananmen, tańqýraımen, lımonmen, qulpynaımen, qoıbúldirgenmen 13 túri shyǵarylady.

Táttiniń túrlerin san qıly etý qamyr­dyń quramy men jaqpasyna baılanysty. Osynyń ishinde tutynýshylar arasynda eń kóp suranysqa ıe «Ýmka» pirándikteri aq jáne qara shokoladpen, keıde jer­jań­ǵaq qosyp pisiriledi. Pirándiktiń dál osy túrin Tekeliniń brendi deýge bolady. Sehqa bógde adamnyń kirýine ruqsat etilmeıdi. Munda ondaǵan jyldan beri pirándik pisirý sheberleri erekshe reseptti kózdiń qarashyǵyndaı qorǵap, barynsha qupııa saqtap keledi.

«Shıkizattyń qymbattaǵanyna baılanysty ónimderimizdiń quny óskeni ras. Biz otandyq ónimderdi, ıaǵnı ózimizde shyǵatyn un, maı, qant, sútti qoldanamyz. О́tken kóktemde elimizdegi kóptegen kondıtermen qatar qant tapshylyǵy problemasymen biz de betpe-bet keldik. Biraq jergilikti ákimdiktiń qoldaýy arqyly Almatydan qant jetkizildi. Bıyl qantqa qatysty mundaı dúrbeleń bolmaıdy dep úmittenemiz», deıdi T.Tóńkerisuly.

Osy rette eske sala keteıik, oblystyq tu­raq­tandyrý qoryna jetisýlyqtar úshin Kóksý qant zaýytynan 2 190 tonna qant satyp alyndy. Buǵan jalpy somasy 920 mln teńge jumsalǵan. Ondaǵy maqsat byltyrǵydaı qant tapshylyǵy týyndaǵan jaǵdaıda nemese baǵa kúrt ósken sátte qant satylymǵa shyǵarylady. Bul óńirde sheker jetispeýshiliginiń aldyn alýǵa yqpal etetin birden-bir amal bolmaq. Qarapaıym halyq bekerden beker alańdamasa bolady.

Jetisý oblysy