Búginde aýyldarda kásip bastap, táýir turmys keshkender qatary molaıyp keledi. Bul oraıda qoǵamnyń kez kelgen múshesine múmkindik jasalǵan. Máselen, Qaraǵandy oblysynyń Nura aýdanynda turatyn múmkindigi shekteýli jandar grant arqyly bıznesin urshyqsha ıirip otyr.
Ekinshi toptaǵy múgedektigi bar Elena Kolesnıkova Nura aýylynda turady. Onyń mamandyǵy ekonomıst eken. Alaıda bul mamandyqpen jumys istep kórmepti. Úıdiń sharýasymen otyrǵan úsh balanyń anasy. Desek te, «Bastaý Bıznes» arqyly bilim alyp, odan soń sańyraýqulaq ósiretin kásibin ashypty.
– Jasym 38-de, úsh balam bar. Birneshe jyl úı sharýasymen júrdim. Ekinshi toptaǵy múgedektigim de bar. Byltyr arnaıy dáris alyp, grantqa ótinish berdim. Komıssııa meniń bıznes-josparyma qoldaý kórsetti. Sol arqyly óz isimdi bastap kettim. Garajdy sańyraýqulaq ósirýge beıimdep, berilgen grantqa qajetti jabdyq satyp aldym. Búginde bir jarym aıda bir ret 100 kelige jýyq aspa sańyraýqulaq ósiremin. Negizi, kásip bastaǵysy kelgenderge táýekel etý týraly keńes berer edim. Eń bastysy – maqsat qoıý. Sodan soń oǵan qadam jasaý, – deıdi
Elena.
Elenanyń sańyraý-qulaqtaryn aýdannyń turǵyndary tutynady. Ony saýdaǵa shyǵaratyn kelisilgen saýda oryndary bar. Buıyrtsa, Elena aldaǵy ýaqytta sańyraýqulaq ósirý óndirisin ulǵaıtýdy oılaıdy. Buǵan qosa tuzdalyp, saqtalatyn sańyraýqulaq shyǵarýdy kózdep otyr.
Dál osyndaı grant arqyly massaj bólmesin ashqan Saparbek Jaqudın – burynǵy órt sóndirýshi. Ol órt kezinde kózinen zaqym alyp qalǵan eken. Búginde Saparbek Astanadan qytaılyq massaj kýrstaryn oqyp, osy oraıda bıznes-ıdeıasyn iske asyra alypty. Aldymen «Bastaý Bıznes» jobasy negizinde kásipkerlik saýattylyqty meńgerse kerek. Sońynan ıdeıasy arqyly 1 mln 225 myń teńge grant jeńip alyp, massaj bólmesin ashqan kórinedi. Granttar kásipkerlikti damytýdyń 2021-2025 jyldarǵa arnalǵan ulttyq jobasy aıasynda tabystalatynyn atap ótken jón.
Resmı uıymdar jarııa etken derekterge júginsek, byltyr Nura aýdanynda «Bastaý Bıznes» jobasy arqyly barlyǵy 167 adam bilim alǵan. 59 adamǵa grant berilgen. Onyń ishinde 16 adam múmkindigi shekteýli jandar tizimindegiler.
– Bıznes-jobalardy tabysty iske asyrýdyń taǵy bir mysaly – Qaroı aýylyndaǵy tigin sehy. Ony Týtıkovtar otbasy ashty. Otbasyndaǵy tórt adam múgedek. Barlyǵynyń týa bitken kemistigi bar, sóıleý jáne estý qabileti tómen. Olar qazir tapsyryspen kıim, tósek-oryn, kórpe-jastyqtar tigedi, – deıdi Nura aýdanynyń jumyspen qamtý jáne áleýmettik baǵdarlamalar bóliminiń basshysy Dınara Ermekova.
Sonymen qatar Nura aýdanynda bıyl múmkindigi shekteýli turǵyndardyń 15 jobasyn qarjylandyrý josparda bar. Granttar somasy 1 mln 400 myń teńgege deıin ulǵaımaqshy.
Qaraǵandy oblysy
