Úshqońyrdyń qyrany

Meken etken Úshqońyrdyń qııasyn, Kókiregine qotaratyn kúı asyl. Qyran otyr tekshe tasty tuǵyr ǵyp, Quz-qııaǵa salyp alyp uıasyn. Artta qalyp Úshqońyrdyń kezeńi, Tańnan samǵap kók kúmbezin kezedi. Býyndyrǵan balaq baýyn laqtyrǵan, Azattyqtyń atar tańyn sezedi. Ala bult pen qara bultty sapyryp, Ekpinimen eskek jeldi japyryp, Arpalysar aspan asty, jer ústi, Ýaqyttan teńdik surap aqyryp! Sony soqpaq bir qıyrda jatqandaı, Sol soqpaqqa tóte joldy tapqandaı. Qalyń kóshti ózi bastap keledi, Aı astynda aqıyq qus – aq mańdaı! Qara túnek qarsy aldynan jolyqqan, Kezi qaısy qyran qustyń toryqqan. Soqpasy kóp soqpaq joldyń ústinde, Tires kerek, kúres kerek – sony uqqan! Bulyń-bulyń joldar qalyp artynda, Qanat qaqty jaı oǵyndaı jarqyldap! Úshqońyry tilek qosyp turdy oǵan – «Qyran qusym, alqynba da tartynba!» Kúnniń kózin kim jabady qalqalap, Bir ózińe kóz tigedi shartarap. Qyran samǵap bara jatyr baqytqa, Bar qazaqtyń aq armanyn arqalap! Tólegen QAJYBAI. Kókshetaý.