ASTANA. 22 maýsym. Búgin tún ortasy aýa Brazılııanyń Fortaleza qalasynda Germanııa jáne Gana quramalary kezdesti. Tartysty ótken oıyn 2:2 esebimen teń aıaqtaldy. Bul týraly egemen.kz habarlady.
Germanııa – Gana 2:2 (0:0).
21 maýsym. Fortaleza. «Kastelan» stadıony. Tóreshi - Sandro Rıchchı (Brazılııa).
Germanııa: Manýel Noıer, Jerom Boateng (Shkodran Mýstafı, 46), Mats Hýmmels, Per Mertezaker, Benedıkt Hevedes, Fılıpp Lam, Tonı Kroos, Samı Hedıra (Bastıan Shvaınshtaıger, 69), Mesýt Ozıl, Marıo Getse (Mıroslav Kloze, 69), Tomas Mıýller.
Gana: Fatavý Daýda, Djonatan Mensa, Djon Boı, Harrıson Affýl, Sallı Mýntarı, Mohammed Rabıý (Emmanýel Agemang-Badý, 77), Kvadvo Asamoa, Krıstan Atsý (Mýbarak Vakaso, 72), Andre Aııý, Kevın-Prıns Boateng (Djordan Aııý, 52), Asamoa Gıan.
Goldar: Marıo Getse (51), Andre Aııý (54), Asamoa Gıan (63), Mıroslav Kloze (71),
Eskertý: Sallı Mýntarı (90+3).
Komandalar munyń aldyndaǵy birinshi týrdyń oıyndarynda eki túrli nátıje kórsetken edi. Aıtalyq, nemister portýgaldardy 4:0 etip talqandap shyqsa, ganalyqtar AQSh quramasynan 1:2 bolyp utylyp qalǵan bolatyn. Al myna oıynnyń birinshi taımy ujymdardyń osyndaı úlken aıyrymdary bar ekenin kóp asa baıqata qoımady.
Degenmen, Germanııanyń alǵa birinshi umtylysynan qarsy qaqpa aldynda qaýipti sát týa jazdady. Buǵan sol qaptaldan júgirgen Marıo Getse sebepkerlik etpek boldy. Ol alǵa qaraı asyrǵan dobynyń sońynan qýyp ketkende, ganalyq qorǵaýshy sońǵy sáte aıaǵyn qoıyp, aýtqa jiberip úlgerdi.
Nemister 11-mınýtta da qaýipti qımylǵa qulash urdy. Olar oń qaptaldan kókteı ótti. Fılıpp Lam taǵy Mesýt Ozaldy alǵa ozdyrdy. Ol burylyp, dopty 11 metrlik núkte aýdanyna jetkizdi. Sol jerde turǵan Tomas Mıýller ózi urmaı, dopty artqa qaraı tastady. Al oǵan Tonı Kroos egelik etip, 15 metr qashyqtyqtan qaqpaǵa qaraı quıyndata urdy. Biraq dop qaqpashy tıip qaıtty.
Budan keıin Gana quramasynyń oıynshylary da qaýipti sátter jasaýǵa bas qoıdy. 15-mınýtta alań ortasynan dop alǵan Krıstıan Atsý ilgeri qaraı tez baryp, 22 metr jerden qaqpaǵa soqqy baǵyttady. Qaqpashy Manýel Noıer ony kútip tur edi. Ol sondyqtan dopty qaǵyp úlgerdi.
Alaıda, alańdaǵy barlyq negizgi oqıǵalar ekinshi taımda ótti. Muny 51-mınýtta nemis Marıo Getseniń esep ashýy qyzdyryp jiberdi. Alań ortasynda dop alǵan Fılıpp Lam aınalasyna sál qarap alǵasyn, aıyp alańynyń oń jaǵyndaǵy Mıýllerge pas tastady. Tomas ony alǵan boıda qaqpashy syzyǵyna qaraı jóneltti. Gol!
Biraq bul basymdyq kóp ýaqyt dáýren súrgen joq. Arada bar-joǵy úsh mınýt ýaqyt ótkende, ganalyq Andre Aııý esepti teńestirdi. Ol qorǵaýshy Harrıson Affýldyń qaqpanyń alys buryshyna tastaǵan dobyna basqalardan buryn jetti. Oǵan Noıer umtylǵanymen jete almady. Sóıtip, esep 1:1-ge aınaldy.
Osydan keıin burynǵydan da batyldana túsken afrıkalyqtar shabýyldy údetti. Olar on mınýtqa jýyq ýaqyt boıy osy basymdyqty saqtap turdy. Al onyń sońy 63-mınýtta taǵy bir goldyń soǵylýyna aparyp jetkizdi. Dopty qaqpaǵa Asamoa Gıan túsirdi.
Gana quramasy budan keıin de joıqyn joryqty jalǵastyra berdi. Bul qysymǵa shydamaǵan Germanııa quramasynyń bas jattyqtyrýshysy Fılıpp Lıov 69-mınýtta alańdaǵy eki oıynshyny birdeı almastyrdy. Atap aıtqanda, Getseniń ornyna – Mıroslav Klozeni, al Samı Hıdıranyń ornyna Bastıan Solardyń arasynda Shvaınshtaıgerdi shyǵardy. Bulardyń sońǵysy tez oıynǵa aralasyp, 70-mınýtta sol qaptaldan kelip, dopty aıyp alańyndaǵy Mesýt Ozılge jetkizdi. Budan ary Ozıl ony qaqpanyń jaqyn múıisine urdy. Sol dop qorǵaýshynyń aralasýymen aýtqa ketti. Buryshtama! Ony Tonı Kroos qaqpashy alańyna qaraı áýeletti. Ol aınalyp kelip jerge túser-túspeste Kloze aıaǵyn tosa qoıdy. Gol! Osymen Mıroslav óziniń álem chempıonattary tarıhyndaǵy 15-shi dobyn saldy. Esep qaıta teńesti.
Eki jaq budan keıingi ýaqytty aqyryna deıin óte joǵary qarqynda, qatty shabýyl ústinde ótkizdi. Eki jaqtyń da artyq gol soǵyp, jeńisti tartyp áketýine múmkindikteri boldy. Biraq sońǵy sátte olar qaqpaǵa darymaı jatty. Oıyn osyndaı shabýyl ústinde aıaqtaldy.
Damır Qojamqul.
Derekkóz: Chempıonat. Rý.
Foto: Sportbox.ru.
