Sonyń nátıjesinde «Qazaqstan Respýblıkasynyń keıbir zańnamalyq aktilerine Medısınalyq jáne farmasevtıkalyq qyzmetkerlerdiń eńbegin retteý máseleleri boıynsha ózgerister men tolyqtyrýlar engizý týraly» zań jobasy ázirlenip, Parlament Májilisine, Ádilet, Eńbek jáne halyqty áleýmettik qorǵaý jáne Densaýlyq saqtaý mınıstrlikterine usynys joldandy.
Ǵalymdar atalǵan máseleni egjeı-tegjeıli zertteý maqsatynda respýblıkanyń alty óńirinde bolyp, jergilikti densaýlyq saqtaý uıymdarynyń qyzmetkerleri arasynda 1 myńnan astam saýaldama men suhbat júrgizgen. Zertteý nátıjesi kórsetkendeı, medısınalyq jáne farmasevtıkalyq qyzmetkerlerdiń eńbek qatynastary zańnamada zańdy túrde rettelmegen. Bul jumysqa zań ǵylymdarynyń doktory, professor Eńlik Nurǵalıeva jetekshilik etti.
– Jalpy, osy sanattaǵy mamandar jumysynyń aýyrlyǵy ǵana emes, olardyń densaýlyǵyna da tıetin zııan kóp. Sondyqtan olardyń jumysyn quqyqtyq retteý qajet. Ulttyq zańnamany damytýdyń barlyq kezeńinde medısına jáne farmasevtıka qyzmetkerleriniń eńbegin quqyqtyq retteýdi odan ári jetildirý úshin zertteý aıasynda teorııalyq jáne praktıkalyq materıaldarǵa keshendi taldaý jasaldy. Biz bastapqy aqparatty jınaý maqsatynda birqatar aımaqta dalalyq zertteý júrgizdik. Sonyń nátıjesinde medısına jáne farmasevtıka mamandarynyń eńbek jaǵdaılary týraly jedel derekterge toly suhbat jáne saýaldama aldyq, – dedi ýnıversıtet professory.
Osy tarapta ǵalymdar halyqaralyq tájirıbeni de zerttep, onyń ishinde EYDU-nyń jekelegen memleketterindegi quqyqtyq retteý joldaryn qarastyrǵan. Mysaly, Ulybrıtanııada 1,44 mıllıon mamandy qamtıtyn 32 medısınalyq jáne farmasevtıkalyq kásipti retteýge toǵyz organ jaýap beredi. Munda kásibı retteýmen qatar memlekettik retteý de qoldanylady.
Qysqasy, ǵalymdar ózderi júrgizgen zertteý nátıjesi medısına jáne farmasevtıka qyzmetkerleriniń eńbegin quqyqtyq retteý máselesinde zańnama men quqyq qoldaný praktıkasyn odan ári jetildirýge yqpal etedi degen senimde.
