ASTANA. 23 maýsym. Keshe túnde Brazılııada ótip jatqan álem chempıonatynda Koreıa men Aljır komandalary kezdesip, afrıkalyqtar 4:2 esebimen jeńiske jetti. Bul týraly egemen.kz habarlady.
Koreıa – Aljır 2:4 (0:3).
22 maýsym. Portý-Alegrı. «Beıra-Rıo» stadıony. 42 732 kórermen. Tóreshi - Vılmar Roldan (Kolýmbııa).
Koreıa: Djýn Sýn Ren, Lı En, Hon Djon Ho, Kım En Gvon, Iýn Sok En, Han Gýk En (Djı Don Von, 78), Lı Chýn En (Lı Gyn Ho, 64), Ký Dja Chhol, Pak Djý En (Kım Shın Výk, 57), Son Hyn Mın.
Aljır: Raıs Mbolı, Aıssa Mandı, Karl Medjanı, Madjıd Býgerra (Essaıd Belkalem, 89), Rafık Allısh, Djamel Mesba, Sofıan Fegýlı, Iаsın Braımı (Mehdı Lasen, 77), Abdelmýmen Djabý (Nabıl Gılas, 73), Nabıl Bentaleb, Islam Slımanı.
Goldar: Islam Slımanı (26), Rafık Allısh (28), Abdelmýmen Djabý (38), Son Hyn Mın (50), Iаsın Braımı (62), Ký Dja Chhol (72).
Eskertýler: Lı En (54), Han Gýk En (69) – Madjıd Býgerra (67).
Bul N tobynda osy kezge deıin ótken barlyq oıyndardyń arasyndaǵy eń qyzyqsyzdary Reseı quramasynyń qatysýymen ótken matchtar bolyp otyr. Birinshi týrda oınalǵan Koreıanyń osy el jasaǵymen kezdesýi barynsha súreńsiz bolyp shyqty. Ekinshi týrda belgııalyqtar da jarqyldaǵan oıynymen kózge túspegenimen, túpki maqsatyna qol jetkizip, 6 upaımen kelesi kezeńge shyǵý máselesin sheship aldy. Al koreılerdiń Aljır quramasymen aıqasy barynsha tartysty da qyzyqty boldy.
Oıyn bastalǵannan afrıkalyq arabtar ózderiniń aldaryna úlken maqsat qoıyp otyrǵandaryn tanytyp aldy. Olar birinshi taımda qarsylastaryn alyp ta jyqty, shalyp ta jyqty. Sonyń nátıjesinde qarsylastary qaqpasyna jaýapsyz úsh gol salyp úlgerdi.
Kezdesýdiń basynan onyń tizginin qoldaryna ustaǵan aljırlikter taımnyń ortasy aýa ony golǵa aınaldyra bildi. Olardyń serııaly shabýyldarynyń núktesin 26-mınýtta Islam Slımanı qoıdy. Ol qaqpashymen jeke-dara shyqqan sátin paıdalanyp ketti. Jaǵdaıdyń bulaısha qalyptasýy ábden zańdy edi. Munyń artynsha aıyp alańyna quıyndaı quıǵytyp kirgen Iаsın Braımıdyń taǵy bir gol soǵatyn múmkindigi boldy. Biraq onyń soqqy jasaýyna qorǵaýshylar kedergi keltirdi. Degenmen, muny sáti uzaq kúttirmedi. 28-mınýtta buryshtamadan tastalǵan dopqa koreı qaqpashysy jete almady, sosyn ony Rafık Allısh bıik sekirip, qaqpaǵa sart etkizdi – 2:0! Arada taǵy bir on mınýt ótkennen keıin Abdelmýmen Djabý áriptesi Slımanıdyń aıaǵynyń astyna salyp bergen dobyn tordyń aıasynan bir-aq shyǵardy. Osylaısha birinshi taımda-aq oıynnyń taǵdyry sheshilip qalǵandaı boldy.
Koreıa fýtbolshylary ekinshi taımdy belsendi bastady. Buǵan birinshi kezeńdegi esepten keıin aljırlikterdiń eptep bosańsyǵandary da áser etken sııaqty. Aqyrynda kóp uzamaı koreıler bir doptyń qarymtasyn qaıtara aldy. Alaıda, budan keıin eki jaq dop almasty da, negizgi basymdyq sol qalpynda saqtalyp qaldy.
Damır Qojamqul.
Derekkóz: Chempıonat.Rý.
Foto: Sportbox.Ru.
