Sofııadaǵy saıysqa el birinshiliginiń jeńimpazdary men júldegerleri, sondaı-aq halyqaralyq baıraqty básekelerde álem jáne Azııa chempıonatynyń, Olımpııa oıyndarynyń júldegerlerinen jasaqtalǵan 12 boksshymyz qatysty. Tipti olardyń qatarynda ulttyq quramaǵa bir jarym jyldan keıin qaıta oralǵan 2019 jylǵy álem chempıony deıtin dardaı ataǵy bar Bekzat Nurdáýletov, Tokıo Olımpıadasynyń qola júldegeri Qamshybek Qońqabaev bar. Biraq bul boksshylardan esh qaıran bolmady.
Tek atalǵan jarystyń fınalynda judyryqtasqan 57 kılodaǵy Orazbek Asylqulovtyń ǵana óneri jankúıerlerdiń kóńilinen shyqty. Aqmolalyq boksshy Bolgarııadaǵy básekeniń fınalynda tek jarys qojaıyny Haver Ibaneske tóreshilerdiń sheshimimen jol berdi (1:4) demeseńiz, jarys boıy aıdarynan jel esken kil myqtylardy tuǵyrdan taıdyrdy. Máselen, shırek fınalda О́zbekstannyń dańqty boksshysy, jastar arasyndaǵy álem jáne Olımpıada chempıony, eresekter arasyndaǵy sary qurlyq birinshiliginiń jeńimpazy, álem chempıonatynyń kúmis júldegeri Abdýmalık Halokovty, byltyrǵy Eýropa chempıonatynyń kúmis júldegeri Artýr Bazeıandy kúmánsiz jeńdi. Al fınalda shyqqan tegi kýbalyq, biraq Bolgarııa quramasy sapynda judyryqtasatyn Haver Ibanesten tóreshilerdiń aralas sheshimimen ǵana utyldy.
Jartylaı fınalda judyryqtasqan 75 kılodaǵy Nurqanat Raıys dástúrli týrnırdiń qola júldegeri atandy. Qazaqstan birinshiliginiń jeńimpazy, Azııa birinshiliginiń kúmis júldegeri Nurqanat fınalǵa beriler joldamany jergilikti boksshy Ramı Kıvanmen sarapqa salyp, qarsylasyna jol berdi.
Jasyratyny joq, Qazaqstannyń boks jankúıerleri Sofııa sharshy alańynda ulttyq quramaǵa qaıta oralǵan Bekzat Nurdáýletov pen Tokıo Olımpıadasynyń qola júldegeri Qamshybek Qońqabaevtan altyn kútken edi. О́kinishke qaraı, el úmit artqan eki boksshymyz da Bolgarııadan quralaqan oralyp, senim údesinen shyǵa almady. 80 kılo salmaqta judyryqtasqan 2019 jylǵy álem chempıony shırek fınalda aty kópshilikke beımálim, О́zbekstan quramasynyń ekinshi álde úshinshi nómirli boksshysy Jasýrbek Iýldoshevke ese jiberdi. +92 kılodaǵy Qamshybek Qońqabaev alǵashqy aınalymda Nıderland ókili Sten Bertensomdy ekinshi raýndta nokaýtqa jibergen soń jankúıerler Qońqabaev pen Jalolov ekeýiniń arasyndaǵy tartysty jekpe-jektiń kýási bolýǵa asyqty. Biraq shırek fınalda otandasymyz ózbekstandyq qarsylasymen judyryqtasýdan bas tartyp, rıngke shyqqan joq. Munyń sebebine úńilsek, Qońqabaev jaraqatyna baılanysty jarysqa shyqpapty. Biraq bul ýájge jankúıerler senbeıdi. Olar munyń astarynda basqa gáp bar dep esepteıdi...
Osylaısha, álemniń 38 elinen kelgen 400-ge jýyq boksshy judyryqtasqan saıysta Qazaqstan quramasy 1 kúmis jáne 1 qolamen jalpykomandalyq esepte 7-orynǵa turaqtady. 7 altyn, 4 kúmis, 5 qola medal jeńip alǵan О́zbekstan medal kestesinde jeke-dara kósh bastady. Keıingi oryndarǵa Bolgarııa (4+1+1) men AQSh (1+2) quramalary jaıǵasty.
Byltyr dál osy týrnırde Qazaqstan quramasy 2 altyn, 2 kúmis jáne 5 qola júldemen jalpykomandalyq esepte Reseı boksshylarymen ekinshi jáne úshinshi oryndardy ózara bólisken edi. Bas júlde ádettegideı О́zbekstan quramasynyń enshisinde ketken bolatyn. Ońtústiktegi kórshilerimiz bıyl bizden áldeqaıda uzap ketti. Medal sany jaǵynan da, deńgeıi jaǵynan da.
