1 naýryzda Qazaqstan ortalyq konsert zalynyń sahnasynda aty ańyzǵa aınalǵan «Gúlder» ansambliniń jańa quramynyń tanystyrylymy jáne alǵashqy konserti ótedi. QR Mádenıet jáne sport mınıstrliginiń qoldaýymen uıymdastyrylatyn sharaǵa qazaq estradasynyń juldyzdary, jas oryndaýshylar jáne ujymnyń burynǵy músheleri qatysady.
Bul konsert mınıstrliktiń 50 jyldyq tarıhy bar ansambldi jandandyrý jolyndaǵy qajyrly eńbeginiń nátıjesi. Joba ótken jyldyń tamyz aıynda bastaldy. Aldymen «Gúlder» bı jáne aspaptyq toptaryna ónerpazdar qabyldandy. Irikteý týry shyǵarmashylyq oqý oryndarynyń túlekteri arasynda ótkizildi.
Tálimgerlerdiń biri retinde baletmeıster Anvara Sadyqova shaqyryldy, al jobanyń kórkemdik jetekshisi, dırıjeri - Serik Davletov.
- «Gúlder» ansambliniń shyǵarmashylyǵyna qazaqstandyqtardyń birneshe býyny tánti bolyp ósti, sondyqtan osyndaı taǵylymdy tarıhy mol ujym tyńdaýshylardy qýantýdy jalǵastyrýy ońdy bolar edi. Ásirese, qazirgi jastarymyz ujymnyń repertýarynan rýhanı qýat alary sózsiz. Alǵashqy kúnderinen bastap talanttardyń naǵyz ustahanasy bolǵan ansambl aty ańyzǵa aınalǵan ondaǵan oryndaýshynyń úlken sahnaǵa shyǵýyna jol ashty. Mundaı dańqty dástúrdi jańǵyrtý kerek dep sanaımyn», – dedi Mádenıet jáne sport mınıstri Ashat Oralov.
Aıta keteıik, «Gúlder» ansambli 1969 jyly qurylǵan. Onyń quramynda ár ýaqytta Roza Rymbaeva, Aıjan Nurmaǵambetova, Maqpal Júnisova, Naǵıma Esqalıeva, Jeńis Seıdollauly, Baqtııar Taılaqbaev jáne basqa da kórnekti oryndaýshylar óner kórsetti.
Qaıtadan jańartylǵan ujymnyń konsertteri Qazaqstannyń basqa da qalalarynda ótedi. Sondaı-aq ansambl shetelge de shyǵarmashylyq saparmen shyǵýdy josparlap otyr.
