Oqıǵa keshe keshke qalanyń Almaly aýdanynda bolǵan.
«JBO jedel kezekshisinen Chevrolet kóligine adamdy kúshtep otyrǵyzý týraly habarlama kelip tústi. Qala boıynsha arnaıy «Perehvat» jospary engizildi. Atalǵan kólik Gogol men Pýshkın kósheleriniń qıylysynda kózge túsken. Izine túsý nátıjesinde kólikti eki ekıpaj Maqataeva men Jetisý kósheleriniń qıylysynda jaýyp tastady. Salonda úsh adam bolǵan, olar ustaldy. Júksalǵyshtan taǵy bir er adam tabyldy, ol atalǵan kóliktiń ıesi ekendigi belgili boldy. Kúdiktiler jedel-tergeý tobyna tapsyryldy. Endi olardyń áreketine quqyqtyq baǵa beriledi», dedi Almaty qalasy PD JPQB PPP vzvodynyń komandıri Meıirjan Qalkeev.
Ustalǵandardyń aıtýynsha, Chevrolet kóliginiń ıesi olardy iri kólemdegi aqshaǵa aldap ketken.
Osylaısha olar qaryzdy qaıtaryp almaq bolǵan. Al jábirlenýshi kerisinshe aıtyp, ony qutqarǵan polısııa qyzmetkerlerine alǵysyn bildirdi.
Qylmystyq istiń basqa da mán-jaılary QR QPK-niń 201 baby jáne QR Konstıtýsııasynyń normalaryna sáıkes jarııa etýge jatpaıdy.
