Oleg Kıselev jetekshilik etetin Qazaqstan basketbolshylary eki kezeńnen turatyn Azııa aımaǵyndaǵy irikteý matchtarynyń alǵashqysyn sátti bastap, basketbol sportynan da joǵary oryndarǵa úmitti ekenimizdi baıqatqandaı edi. D tobynda Sırııa, Iran jáne Bahreın sııaqty irgeli quramalarmen sheberlik baıqasqan jerlesterimiz bes matchta jeńiske jetip, tek bireýinde ǵana jeńilistiń kermek dámin tatýǵa májbúr boldy. Osy kórsetkishimen otandastarymyz óz tobynda kósh bastap, irikteýdiń 2-aınalymyna joldama aldy.
Atap aıtqanda, elordada ótken alǵashqy oıynda bizdiń jigitter Sırııadan kelgen basketbolshylardy 84:74 esebimen tize búktirse, jaýapty matchta 81:71 nátıjesimen ekinshi ret jeńdi. Keıingi týrda Iran basketbolshylarynan (73:69) basym túsip, tórtinshi matchta Bahreındi óz elinde tas-talqanyn shyǵardy – 95:48. Al 2022 jyldyń shildesinde Irandy 8 upaı aıyrmashylyǵymen (68:60) utsa, esh mańyzy qalmaǵan sońǵy týrda Bahreın quramasyna jol berdi – 82:51 (29:24, 28:5, 12:10, 13:12).
Sóıtip, álem kýboginiń ekinshi irikteý kezeńine shyqqan jerlesterimiz bul synda Bahreın, Iran, Aýstralııa, Qytaı jáne Japonııa quramalarymen bir topta oınap, jahandyq dodaǵa beriletin joldamalardy sarapqa saldy. Qazaqstan basketbolshylary birinshi aınalymda Bahreın jáne Iran sportshylarymen bir topta oınaǵandyqtan, bul jolǵy irikteýde atalǵan quramalarmen joldary túıispedi.
Irikteýdiń alǵashqy kezeńinde óreli ónerimen kózge túsip, jankúıerlerdi jarqyn jeńisterimen qýantqan Qazaqstan quramasynyń basketbolshylarynan joǵary nátıje kútken edik. Alaıda ekinshi irikteýde sportshylarymyz sol erlikterin qaıtalaı almaı, janarymen jer shuqyp qaldy. Josparlanǵan alty matchtyń barlyǵynda qarsylastaryna jol berip, taǵy da álem chempıonatynyń básekelerin teledıdardan tamashalaıtyn boldy. 2022 jyldyń tamyz aıyndaǵy eki matchtyń alǵashqysynda jerlesterimiz Qytaı quramasynan utylsa (68:58), keıinnen Japonııa basketbolshylaryna ese jiberdi (73:48). Al qarashadaǵy matchtarda Aýstralııadan – 97:50, Japonııadan 81:61 nátıjesimen ońbaı utyldy.
Qazaqstan oıynshylary qatarynan tórt matchta jeńilse de, Azııa aımaǵyndaǵy sońǵy eki joldamanyń birin enshileýge múmkindigi saqtalyp qaldy. Ol úshin Oleg Kıselıov shákirtteri sońǵy eki matchtyń birinde Qytaı nemese Aýstralııa basketbolshylaryn jeńýge tıis edi. О́kinishke qaraı, bizdiń jigitter bul múmkindikti de paıdalana almaı, san soǵyp qaldy. Syrt alańda ótken eki oıynda da qarsylastaryna ese jiberip, jalǵyz joldamadan qaǵyldy.
Gonkongtyń «Sýen Van Stadıýmda» sport keshenindegi mańyzdy matchtyń alǵashqysynda ulttyq qurama ókilderi Qytaı basketbolshylarynan 71:59 esebimen jeńildi. Kezdesýdi belsendi bastaǵan alań qojaıyndary alǵashqy aınalymdy 21:12 esebimen óz paıdasyna jazsa, úzilisten keıin de qarqynyn bir sátke báseńdetpegen olar 22 upaıǵa qol jetkizdi. Jerlesterimiz nebári 10 upaı ǵana jınaýǵa múmkindik aldy. Úshinshi kezeńde basketbolshylarymyz azdap es jııa bastady. Bul 10 mınýttyqta olar 18:16 esebimen alǵa shyqsa, sheshýshi kezeńde 19:12 nátıjesimen qarsylastarynyń aldyn orap ketti. Alaıda match qorytyndysynda bul upaılar Qazaqstan quramasynyń jeńisi úshin jetkiliksiz boldy.
Qytaı quramasymen ótken qarymta matchta jerlesterimizden Rýstam Myrzaǵalıev kezdesýdiń úzdik oıynshysy atanǵanyn aıta ketken jón. Ol tórt kezeńde 13 upaı jınady.
Sóıtip, sheshýshi eki matchtyń alǵashqysynda utylǵan soń, bizdiń quramada bolmashy ǵana úmit qaldy. О́ıtkeni sońǵy týrda álemdik reıtıngte úshinshi, Azııa qurlyǵynda kósh bastap turǵan Aýstralııa baskebolshylarynan upaı alý tipti múmkin emes edi. Onyń ústine «Jasyl qurlyq» ókilderi elordadaǵy matchta jerlesterimizdi iri eseppen (97:50) jeńip ketkenin jankúıerler umyta qoıǵan joq. Qarymta kezdesýdi óz alańynda ótkizetin Aýstralııa bizdiń jigitterge esh múmkindik qaldyrmaıtyny áý bastan belgili boldy. Kópshilik kútkendeı match tolyq jergilikti sportshylardyń basymdyǵymen ótti. Birinshi kezeńde 21:13 esebimen jeńiske jetken aýstralııalyqtar ekinshi aınalymda 25:14 nátıjesimen alǵa uzap ketti. Al úshinshi kezeńde alań ıeleriniń qarqyny tipti qatty boldy – 33:11. Sońǵy 10 mınýttyqta Aýstralııa basketbolshylary belsendiligin báseńdetkenimen, jerlesterimiz báribir jeńiske jete almady – 19:15. Qorytyndy esep – 98:53, Aýstralııa quramasynyń paıdasyna.
Osylaısha, Qazaqstan quramasy ekinshi irikteý kezeńiniń barlyq matchynda jeńilip, el úmitin aqtaı almady. Al Azııa qurlyǵynyń sońǵy eki joldamasy Iran men Iordanııa basketbolshylaryna buıyrdy.
Azııa aımaǵynan bólek, 23-27 aqpan aralyǵynda ózge qurlyq ókilderi de álem chempıonatynyń irikteý matchtaryn ótkizip, álem chempıonatyna baratyn quramalar anyqtaldy. Jalpy, Dúnıejúzilik basketbol federasııasynyń erejesi boıynsha álem chempıonatyna Eýropanyń – 12, Azııa jáne Muhıt aımaǵynyń – 8 (jarysty uıymdastyrýshy memleketterdi qosa eseptegende), Soltústik jáne Ońtústik Amerıkanyń – 7 jáne Afrıka qurlyǵynyń 5 quramasy qatysady.
Álem chempıonatyna qatysatyn 32 qurama tómendegideı:
Eýropa: Grýzııa, Germanııa, Grekııa, Italııa, Ispanııa, Latvııa, Lıtva, Serbııa, Slovenııa, Fınlıandııa, Fransııa, Chernogorııa.
Ońtústik jáne Soltústik Amerıka: Brazılııa, Venesýela, Domınıkan Respýblıkasy, Kanada, Meksıka, Pýerto-Rıko, AQSh.
Azııa jáne Muhıt aımaǵy: Aýstralııa, Iordanııa, Iran, Lıvan, Qytaı, Jańa Zelandııa, Fılıppın, Japonııa.
Afrıka: Angola, Mysyr, Kabo-Verde, Kot d’Ivýar, Ońtústik Sýdan.
32 quramanyń ishindegi tórt memlekettiń basketbolshylary bıyl óz tarıhynda alǵash ret álem chempıonatyna qatysady. Olar: Latvııa, Grýzııa, Kabo-Verde jáne Ońtústik Sýdan.
Basketboldan 2023 jylǵy álem chempıonaty 25 tamyz ben 10 qyrkúıek aralyǵynda birden 3 memlekette – Indonezııa, Japonııa jáne Fılıppınde ótedi. Qazaqstan quramasy 2019 jyly álem birinshiliginiń ekinshi irikteý kezeńine ótkenimen, bıylǵydaı fınaldyq saıysqa joldama ala almaǵan edi. Sol jyly Qytaıda jalaýy jelbiregen jahandyq dodada Ispanııa quramasy jeńiske jetken bolatyn. Pıreneı túbeginiń ókilderi fınalda Argentınadan basym túsken-di – 95:75.
