Ishki ister mınıstrligi Kúzet qyzmetin baqylaý departamenti basqarmasy bastyǵynyń orynbasary Serik Quspanovtyń aıtýynsha, 2000 jylǵy 19 qazanda «Kúzet qyzmeti týraly» zań qabyldandy. Qujatta kúzet qyzmetiniń quqyqtyq negizderi belgilendi, ony júzege asyratyn sýbektilerdiń mártebesi men ókilettikteri aıqyndaldy. Eń bastysy, kúzet qyzmeti lısenzııalanatyn túrge jatqyzyldy, bul memleket úshin Ishki ister mınıstrligi atynan oǵan qajetti talaptar qoıýǵa jáne olardyń saqtalýyna memlekettik baqylaýdy júzege asyrýǵa múmkindik berdi.
– Qoǵam qarqyndy damyǵan saıyn kúzet qyzmetteri boıynsha zańnamany jetildirý qajettiligi artyp keledi. Biz óz tarapymyzdan qyzmetimizge qatysty zańnamaǵa únemi monıtorıng júrgizemiz jáne qajet bolǵan jaǵdaıda tıisti túzetýler engizýge bastamashylyq jasaımyz. Máselen, kúzet qyzmeti salasyndaǵy zańnamany jetildirý, jeke jáne zańdy tulǵalardyń azamattyq jáne múliktik quqyqtaryn qorǵaý boıynsha kúzet qyzmetterin kórsetý sapasyn arttyrý maqsatynda biz múddeli memlekettik organdarmen jáne úkimettik emes uıymdarmen birlesip, 2021 jyly Memleket basshysy qol qoıǵan salalyq zańǵa túzetýler engizýge bastamashylyq jasadyq. Bul zań kúzet qyzmetimen aınalysatyn kásipkerlik sýbektileriniń básekege qabilettiligin qoldaýǵa jáne damytýǵa, terrorıstik turǵydan osal obektilerdiń qaýipsizdigin qamtamasyz etý deńgeıin arttyrýǵa baǵyttalǵan, – deıdi Serik Quspanov.
Búginde qoǵamda mekteptegi qaýipsizdikti kúzet fırmalary qamtamasyz etse degen usynys jıi aıtylyp júr. Belgili bolǵandaı, kúzet qyzmetterin kórsetýge arnalǵan sharttar jergilikti bıýdjetten bólingen qarjy sheńberinde memlekettik satyp alý týraly zańnamaǵa sáıkes derbes, tikeleı bilim berý uıymdary men jeke kúzet uıymy arasynda jasalady.
– Bul rette, mektep ákimshiligi qaýipsizdikti qamtamasyz etý sharalaryn jergilikti qarjylandyrý esebinen júzege asyrady. Lısenzııalanǵan kúzet uıymdarynyń kúzetshileriniń vahterlerden, kúzetshilerden jáne qaýipsizdik qyzmetterinen aıyrmashylyǵy atys qarýy men arnaıy quraldardy paıdalanýǵa quqyly. Sonymen qatar kúzetshiler aldyn ala mamandandyrylǵan oqý ortalyqtarynda atys, quqyqtyq, fızıkalyq daıyndyq jáne basqa pánder boıynsha emtıhandar tapsyryp, tájirıbesin arttyryp otyrady, – deıdi Serik Quspanov.
Onyń aıtýynsha, elimizde 3 298 mektep pen 4 214 balabaqshada lısenzııalanǵan kúzet qyzmeti joq.
– 2023 jyldyń 1 qańtaryndaǵy málimet boıynsha tıisti lısenzııasy bar kúzet uıymdary 3 404 mektep pen 1 371 balabaqshany kúzetedi. Onyń ishinde dabyl júıesi arqyly jedel áreket etetin mobıldi toptar arqyly 2 050-ge jýyq mektep pen 790 balabaqsha kúzetiledi. Qalǵan obektiler fızıkalyq kúzetpen qamtylǵan. Oqý oryndarynda lısenzııalanǵan kúzettiń bolmaýy kúzet qyzmetterin satyp alý úshin jergilikti bıýdjetten bólinetin qarajatqa baılanysty. О́ıtkeni jeke kúzet uıymdary olardy aqyly negizde kórsetedi, – deıdi spıker.
2023 jylǵy 1 qańtardaǵy jaǵdaı boıynsha elimizde fılıaldary men ókildikteri bar 3 607 jeke kúzet uıymy tirkelgen, olarda 94 511 kúzetshi jumys isteıdi.
