Ishki ister mınıstrligi sheteldikterdiń kóshi-qon zańnamasyn buzý faktilerin anyqtaýǵa baǵyttalǵan «Mıgrant» jedel-aldyn alý sharasynyń qorytyndysyn shyǵardy.
«Kóshi-qon zańnamasyn buzǵandardy el aýmaǵynan shyǵarý týraly 674 sot sheshimi shyǵaryldy. Barlyq shyǵarylǵan tulǵalarǵa bes jylǵa Qazaqstanǵa kirýge tyıym salyndy. Sonymen qatar óz azamaty bolyp tabylatyn elde qylmys jasaǵany úshin izdeýde júrgen 22 sheteldik ustaldy», dep habarlady IIM baspasóz hatshysy Shuǵyla Turlybek.
Ol Jambyl oblysynda Shekara qyzmeti men UQK birlesip 2022 jyldyń qarashasynda Qazaqstanǵa zańsyz kirgen Pákistannyń toǵyz azamaty, Almatyda Qyrǵyzstan azamaty memlekettik shekarany ótkizý pýnktinen tys jerde zańsyz kesip ótken azamat ustalǵanyn atap ótti.
Sondaı-aq zańsyz kóship kelýshilerge baspana bergen tulǵalarǵa qatysty sotqa deıingi tergeý júrgizilip jatyr.
